കോരിത്തരിപ്പിക്കും ആക്​ഷനുമായി വർഷങ്ങൾക്കു ശേഷം സുരേഷ് ഗോപി: കാവൽ ട്രെയിലർ

ഗുഡ്‌വില്‍ എന്റര്‍ടെയിന്‍മെന്റ്‌സിന്റെ ബാനറില്‍ ജോബി ജോര്‍ജ് നിർമിച്ച് നിഥിന്‍ രണ്‍ജി പണിക്കര്‍ സംവിധാനം ചെയ്യുന്ന സുരേഷ് ഗോപി ചിത്രം കാവലിന്റെ ട്രെയിലർ പുറത്തിറങ്ങി. സുരേഷ് ഗോപിയുടെ അതിഗംഭീര ആക്​ഷൻ രംഗങ്ങളാണ് ട്രെയിലറിന്റെ ഹൈലൈറ്റ്. ലൂസിഫറിൽ മോഹൻലാൽ പൊലീസുകാരന്റെ തോളത്ത് കാൽ വച്ചപ്പോൾ കാവലിൽ സുരേഷ് ഗോപി പൊലീസുകാരന്റെ നെഞ്ചത്ത് മുട്ടുകാൽ വയ്ക്കുന്ന സീനാണുള്ളത്. വർഷങ്ങൾ‌ക്കു മുമ്പ് ആക്​ഷൻ സിനിമകളിലൂടെ നമ്മെ കോരിത്തരിപ്പിച്ച താരം അതേ എനർജിയോടെ സ്ക്രീനിലെത്തുന്നു. 

തമ്പാൻ എന്ന നായക വേഷത്തിൽ സുരേഷ് ഗോപി എത്തുമ്പോൾ ആന്റണി എന്ന ഉറ്റ സുഹൃത്തിന്റെ വേഷത്തിൽ രൺജി പണിക്കരും ചിത്രത്തിൽ വേഷമിടുന്നു. നിഥിന്‍ രണ്‍ജി പണിക്കര്‍ തിരക്കഥ എഴുതി സംവിധാനം ചെയ്യുന്ന ചിത്രത്തിന്റെ ടെയ്ല്‍ എന്‍ഡ് എഴുതുന്നതും രണ്‍ജി പണിക്കര്‍ ആണ്. 

പത്മരാജ് രതീഷ്, മുത്തുമണി, റേച്ചല്‍ ഡേവിഡ്, ഇവാന്‍ അനില്‍, സാദീഖ്, കിച്ചു ടെല്ലസ്, ശങ്കര്‍ രാമകൃഷ്ണന്‍ എന്നിവരാണ് സിനിമയിൽ പ്രധാനവേഷത്തില്‍ എത്തുന്ന മറ്റുള്ളവർ.  രാജേഷ് ശര്‍മ്മ, ബേബി പാര്‍വതി, അമാന്‍ പണിക്കര്‍, ശ്രീജിത്ത് രവി, സുരേഷ് കൃഷ്ണ, സന്തോഷ് കീഴാറ്റൂര്‍, അരിസ്റ്റോ സുരേഷ്, ചാലി പാല തുടങ്ങിയവരും വേഷമിടുന്നു. ദേശീയ പുരസ്കാര ജേതാവ് നിഖില്‍ എസ് പ്രവീണാണ് ചിത്രത്തിന്റെ ഛായാഗ്രഹണം. ജോസഫ് എന്ന ചിത്രത്തിലൂടെ ശ്രദ്ധേയനായ സംഗീത സംവിധായകന്‍ രഞ്ജിന്‍ രാജാണ് സംഗീതം ഒരുക്കുന്നത്. മന്‍സൂര്‍ മുത്തൂട്ടിയാണ് എഡിറ്റിംഗ്.