‘മസ്റ്റ് വാച്ച്’; ടൊവിനോ ചിത്രത്തെ പ്രശംസിച്ച് മഞ്ജു വാരിയര്‍

ടൊവിനോ തോമസ് നായകനായെത്തിയ ‘അന്വേഷിപ്പിൻ കണ്ടെത്തും’ സിനിമയെ പ്രശംസിച്ച് മഞ്ജു വാരിയര്‍. ‘മസ്റ്റ് വാച്ച്’ എന്നായിരുന്നു ചിത്രം കണ്ട ശേഷമുള്ള നടിയുടെ പ്രതികരണം. ഇൻസ്റ്റഗ്രാം സ്റ്റോറിയിൽ സിനിമ കണ്ട ആകാംക്ഷയും സന്തോഷവും നടി പങ്കുവച്ചിട്ടുമുണ്ട്.

സംവിധായകന്‍ ഡാര്‍വിനേയും ടൊവിനോയേയും നിർമാതാവ് ഡോള്‍വിനേയും ക്യാമറ ചെയ്ത ഗൗതം ശങ്കറിനേയുമൊക്കെ പ്രത്യേകം അഭിനന്ദിച്ചിട്ടുമുണ്ട് താരം. 

ഇഷ്ക് സിനിമയുടെ സംവിധായകൻ അനുരാജ് മനോഹറും സിനിമയെ പ്രശംസിച്ച് രംഗത്തുവന്നിരുന്നു. ‘‘പതിഞ്ഞ താളത്തിൽ ഒഴുകിതുടങ്ങി,സംശയങ്ങളുടെയും സംഘർഷങ്ങളുടെയും ചുഴികളിൽ  കലങ്ങി മറിഞ്ഞ്, ആനന്ദ് നാരായണൻ എന്ന സബ് ഇൻസ്പെക്ടറിൽ തട്ടി ഒടുവിൽ തെളിഞ്ഞ് ഒഴുകിയ പുഴപോലെ സുന്ദരമായ സിനിമ’’.–അനുരാജ് കുറിച്ചു.

ടൊവിനോ തോമസിനെ നായകനാക്കി ഡാർവിൻ കുര്യാക്കോസ് സംവിധാനം ചെയ്ത അന്വേഷിപ്പിൻ കണ്ടെത്തും വലിയ പ്രേക്ഷ സ്വീകാര്യതയോടെ തിയറ്ററുകളിൽ മുന്നേറുകയാണ്. ഏറെ മികവുറ്റ രീതിയിൽ ഒരുക്കിയ കറകളഞ്ഞ സസ്പെൻസ് ത്രില്ലർ എന്നാണ് സിനിമയെകുറിച്ച് വന്നുകൊണ്ടിരിക്കുന്ന പ്രേക്ഷകാഭിപ്രായങ്ങള്‍. 

ജിനു വി. ഏബ്രാഹാമിന്‍റെ തിരക്കഥയിൽ ഒരുക്കിയിരിക്കുന്ന സിനിമ പുതുമയുള്ളൊരു ഇൻവെസ്റ്റിഗേഷൻ ഡ്രാമയാണ്. പതിവ് ഇൻവെസ്റ്റിഗേഷൻ ഫോർമുലയിൽ നിന്ന് മാറി, അന്വേഷകരുടെ കഥയാണ് സിനിമ സംസാരിക്കുന്നത്. തിയറ്റർ ഓഫ് ഡ്രീംസിന്‍റെ ബാനറിൽ ഡോൾവിൻ കുര്യാക്കോസ്, ജിനു വി. ഏബ്രാഹാം, വിക്രം മെഹ്‍റ, സിദ്ധാർഥ് ആനന്ദ് കുമാർ എന്നിവർ ചേർന്ന് നിർമിച്ചിരിക്കുന്ന സിനിമ മികച്ച തിയറ്റർ അനുഭവമാകും പ്രേക്ഷകനു സമ്മാനിക്കുക.