പത്തനംതിട്ട ∙ തൃശൂരിലെ ചന്ദ്രബോസ് വധക്കേസിന്റെ പേരിൽ ചെയ്യാത്ത കുറ്റത്തിനു താനും കുടുംബവും മൂന്നു വർഷം പീഡനം അനുഭവിച്ചെന്ന് പത്തനംതിട്ട ജില്ലാ പൊലീസ് മേധാവി ജേക്കബ് ജോബ്. കേരള പൊലീസ് അസോസിയേഷൻ ജില്ലാ കമ്മിറ്റി സംഘടിപ്പിച്ച മാധ്യമങ്ങളും പൊലീസും വിഷയത്തിൽ നടന്ന സെമിനാർ ഉദ്ഘാടനം ചെയ്യുകയായിരുന്നു അദ്ദേഹം.
തന്നെ വഞ്ചിച്ച ഒരു മേലുദ്യോഗസ്ഥൻ ഇടനിലക്കാരനായി പ്രവർത്തിച്ചിരുന്നതായി അറിവുണ്ട്. അദ്ദേഹം അന്ന് ഏതു സ്ഥലത്താണ് ഉണ്ടായിരുന്നതെന്നോ ലീവിലാണോ ഡ്യൂട്ടിയിലാണോ എന്നുപോലും ആരും അന്വേഷിച്ചില്ല. മൊബൈൽ ടവർ ലൊക്കേഷനിലൂടെ ഇതെല്ലാം കണ്ടെത്താമായിരുന്നു. ഇങ്ങനെ പല കാര്യങ്ങളും തനിക്കു വെളിപ്പെടുത്താനുണ്ടെന്നും ജേക്കബ് ജോബ് പറഞ്ഞു.
കേസിലെ പ്രതി നിഷാമുമായി ബന്ധപ്പെടുത്തി തന്നെ അപകീർത്തിപ്പെടുത്തുകയായിരുന്നു. ആദ്യമായി ആ വ്യക്തിയെ ജയിലിൽ അടച്ചതും കാപ്പ ചുമത്തിയതും ഞാനാണ്. നിഷാമുമായി തനിക്ക് അവിഹിതബന്ധമുണ്ടെന്നു പറഞ്ഞുപരത്തി. ജീവിതത്തിൽ ആദ്യമായി ഡിപ്പാർട്മെന്റ് എന്നെ കൈവിട്ടു. കുടുംബം ആത്മഹത്യയുടെ വക്കിൽ നിന്നു കഷ്ടിച്ചാണു രക്ഷപ്പെട്ടത്. പ്രതി നിഷാമിനൊപ്പം നിന്ന പൊലീസ് ഉദ്യോഗസ്ഥരെപ്പറ്റി ആരും മിണ്ടിയില്ല. എന്നോടു മാത്രം അനീതി കാട്ടി. എെൻറ നിരപരാധിത്വം പിന്നീട് അംഗീകരിക്കേണ്ടിവന്നു.
എന്നാൽ, ആ സമയത്തും നേരോടെനിന്ന മാധ്യമങ്ങളുണ്ട്. പൊലീസിലും വിഷവിത്തുകൾ ഏറെയുണ്ട്. ഇതു കണ്ടെത്താൻ പൊലീസിനു കഴിയും. പൊലീസ് ഉദ്യോഗസ്ഥൻ സ്വയം അധഃപതിക്കാൻ ആഗ്രഹിക്കില്ല. പൊലീസിനു നിയമവും നിയന്ത്രണങ്ങളുമുണ്ട്. ജനകീയ പ്രവർത്തനങ്ങളിലൂടെ സമൂഹത്തിന്റെ അംഗീകാരം നേടാൻ പൊലീസിനു കഴിഞ്ഞിട്ടുണ്ടെന്നും ജേക്കബ് ജോബ് പറഞ്ഞു. ജില്ലാ പ്രസിഡന്റ് ടി.എൻ.അനീഷ് അധ്യക്ഷത വഹിച്ചു.
