ലണ്ടൻ ∙ ഇംഗ്ലീഷ് പ്രീമിയര്‍ ലീഗ് കിരീടം ചെല്‍സിക്ക്. വെസ്റ്റ് ബ്രോംവിച്ച് ആല്‍ബിയോനിനെ ഏകപക്ഷീയമായ ഒരുഗോളിന് തോല്‍പിച്ചാണ് ചെല്‍സിയുടെ ആറാം കിരീടനേട്ടം. പകരക്കാരനായി ഇറങ്ങിയ മിച്ചി ബാറ്റ്ഷുവാണ് വിജയഗോള്‍ നേടിയത്. കിരീടം ലക്ഷ്യമിട്ടെത്തിയ ചെല്‍സിയുടെ മുന്നേറ്റങ്ങളെ ബോംവിച്ചിന്റെ പ്രതിരോധനിര അവസാനംവരെ തടഞ്ഞെങ്കിലും വിജയത്തിന് തടയിടാൻ അവർക്കായില്ല.
ഗോള്‍രഹിത സമനിലയിലേക്ക് നീങ്ങിയ മല്‍സരം അവസാനിക്കാന്‍ എട്ടുമിനിട്ട് മാത്രം ശേഷിക്കെയാണ് മിച്ചി ബാറ്റ്ഷു മല്‍സരത്തിലെ ഏകഗോളും കിരീടവും ചെല്‍സിക്ക് സമ്മാനിച്ചത്. എണ്‍പത്തിയേഴ് പോയിന്റോടെ ലീഗിലെ വെല്ലുവിളികളെ അതിജീവിച്ചാണ് ചെല്‍സിയുടെ കിരീടധാരണം. രണ്ടാം സ്ഥാനക്കാരായ ടോട്ടനം ഹോട്സ്പറുമായി പത്തു പോയിന്റ് വ്യത്യാസമാണ് ഈ ജയത്തോടെ ചെല്‍സി നേടിയത്. അവശേഷിക്കുന്ന മുഴുവന്‍ മല്‍സരങ്ങളും ജയിച്ചാലും ടോട്ടനത്തിന് ചെല്‍സിക്കൊപ്പമെത്താനാവില്ല.