എച്ച്ടിസി വൺ - എ9 വിപണിയിലെത്തിയതോടെ ഈ ഫോണിനു ലോകത്തിന്റെ പല ഭാഗത്ത് നിന്നും ഉയരുന്ന ഒരേ ഒരു വിശേഷണമാണ് എച്ച്ടിസിയെ ചൊടിപ്പിച്ചിരിക്കുന്നത് "ഐഫോണിന്റെ ക്ലോണ്‍"' എന്ന വിളിപ്പേരാണ് എച്ച്ടിസിക്ക് നാണക്കേട് ഉണ്ടാക്കിയിരിക്കുന്നത്. എന്നാൽ ഈ കളിയാക്കലുകളുടെ ഇടയിൽ പ്രതികരണവുമായി എച്ച്ടിസിയുടെ സീനിയർ എക്സികൂട്ടീവ് തന്നെ രംഗത്തെത്തിയിരിക്കുകയാണ്.
ഐഫോൺ 6-നു സമാനമായ അരിക് വളഞ്ഞ അലൂമിനിയം ബോഡിയിലുള്ള രൂപകൽപ്പനയോടെയാണ് എ9 എത്തിയിരിക്കുന്നത്, ഐഫോൺ - 6/ഐഫോൺ 6 പ്ലസ് ന്റെ ബോഡി ഡിസൈനിലെ പ്രത്യേക ലൈനുകളും ക്യാമറയുടെ ചുറ്റുമുള്ള തടിപ്പുമൊക്കെ ഈ ഫോണില്‍ എച്ച്ടിസി അതുപോലെ അനുകരിച്ചിക്കുകയാണ്, ഐ ഫോൺ 6-ന്റെ വശങ്ങളിലുള്ള സിം /മൈക്രോ എസ്ഡി കാർഡ് ട്രേ പോലും എ9-ൽ സമാനമായാണ് എച്ച്ടിസി ആവിഷ്കരിച്ചിരിക്കുന്നതെന്നുമൊക്കെയായിരുന്നു എച്ച്ടിസിയെപ്പറ്റി ഐഫോണ്‍ പ്രേമികൾ അഴിച്ചുവിട്ട ആരോപണം.
എച്ച്ടിസി നോർത്ത് ഏഷ്യൻ പ്രസിഡന്റ്, ജാക്ക് ടോങാണ് വൺ - എ9 ന്റെ തായ്‌വാൻ ലോഞ്ചിനിടെ ഐഫോണിനെതിരെ പ്രസ്താവനയുമായി ഡിസൈൻ കോപ്പിയിംഗ് വിവാദത്തിനു ചൂട് പിടിപ്പിച്ചിരിക്കുന്നത്. ജാക്ക് ടോങ് പറയുന്നതനുസരിച്ച് 2013-ൽ എച്ച്ടിസി പുറത്തിറക്കിയ വൺ M7 എന്ന മോഡലിന്റെ യൂണി-മെറ്റൽ ക്ലാഡ് ബോഡി രൂപകൽപ്പനയെ ആപ്പിളാണ് അവരുടെ ഐഫോണുകളിലേക്ക്‌ പിന്നീട് കോപ്പിയടിച്ചത്. മെറ്റൽ ക്ലാഡ് ഫോണുകളിൽ ട്രാൻസീവർ പ്രവർത്തിപ്പിക്കാനുള്ള അതിനൂതന ആന്റിനയുടെ സാങ്കേതികവിദ്യ വികസിപ്പിച്ചെടുത്തതും എച്ച്ടിസിയാണെന്ന് ജാക്ക് ടോങ് കൂട്ടിച്ചേർത്തു.
2013-ൽ ആവിഷ്കരിച്ച മെറ്റൽ ക്ലാഡ് ബോഡി രൂപകൽപ്പന അധിഷ്ഠിതമാക്കി കനവും ഭാരവും കുറച്ചു പുറത്തിറക്കിയ മോഡലാണ് എച്ച്ടിസി വൺ - എ9, അല്ലാതെ ഇതൊരു അനുകരിക്കപ്പെട്ട രൂപകൽപ്പനയല്ലെന്നും എച്ച്ടിസി നോർത്ത് ഏഷ്യൻ പ്രസിഡന്റ് തന്റെ വാർത്താക്കുറിപ്പിൽ വ്യക്തമാക്കിയിട്ടുണ്ട്.
കാർബൺ ഗ്രേ, ഓപൽ സിൽവർ, ടോപാസ് ഗോൾഡ്, ഡീപ് ഗാർനെറ്റ് വകഭേദങ്ങളിൽ ലഭ്യമാകുന്ന ഈ ഫോണ്‍ 1.5 GHz ക്വാഡ് കോർ, 1.2 GHz ക്വാഡ് കോർ എന്നീ രണ്ട് മൊഡ്യൂളുകൾ ഉപയോഗിച്ച് നിർമ്മിച്ചിരിക്കുന്ന 64-ബിറ്റ് ക്വാൾകോം സ്നാപ്ഡ്രാഗൺ 617 ഒക്ടാ കോർ പ്രൊസസറിലാണ് പ്രവർത്തിക്കുന്നത്. ആൻഡ്രോയിഡ് 6.0 മാഷ്മല്ലൊ അധിഷ്ഠിതമായി പ്രവർത്തിക്കുന്ന വണ്‍ എ9 കമ്പനിയുടെ ആദ്യ മാഷ്മല്ലൊ ഹാൻഡ്സെറ്റ് ആണ്.
ഫോണിലെ 13 മെഗാപിക്സൽ റിയർ ക്യാമറ സഫയർ കവർ ലെൻസോടെയാണെത്തുന്നത്. ഇത് f / 2.0 അപെർച്ചറും, ഓട്ടോഫോക്കസ്, BSI, OIS (ഒപ്റ്റിക്കൽ ഇമേജ് സ്റ്റെബിലൈസേഷൻ), 1080 വിഡിയോ റെക്കോർഡിംഗ്, എൽഇഡി ഫ്ലാഷ് എന്നീ പ്രത്യേകതകളും നൽകുന്നുണ്ട്. 4 മെഗാപിക്സൽ അൾട്രാപിക്സൽ ഫിക്സഡ് ഫോക്കസ് ഫ്രണ്ട് ക്യാമറയുള്ള ഈ സ്മാർട്ട്ഫോൺ 2150 mAh ബാറ്ററിയിലാണ് പ്രവർത്തിക്കുന്നത്. വൺ - എ9 ന്റെ 1080x1920 പിക്സൽ റെസലൂഷൻ നൽകുന്ന 5 ഇഞ്ച് ഫുൾ എച്ച്ഡി ഡിസ്പ്ലേയെ കൊണിംഗ് ഗൊറില്ല ഗ്ലാസ് 4 സംരക്ഷിക്കും .
2 ജിബി റാം & 16 ജിബി,3 ജിബി റാം& 32 ജിബി വെർഷനുകളിൽ റാം,ഇൻബിൽറ്റ് സ്റ്റോറേജ് എന്നിവയുമായെത്തുന്ന ഫോണിന്റെ സ്റ്റോറേജ് മൈക്രോ എസ്ഡി കാർഡ് വഴി 2TB വരെ ഉയര്‍ത്താൻ കഴിയും. കണക്ടിവിറ്റിക്കായി 4 ജി എൽടിഇ, 3 ജി, ബ്ലൂടൂത്ത്, വൈ-ഫൈ, മൈക്രോ-യു.എസ്.ബി സൗകര്യങ്ങൾ നൽകുന്ന വണ്‍ എ 9 ഇന്ത്യൻ എൽടിഇ ബാൻഡുകളും പിന്തുണയ്ക്കും.
Disclaimer
ഇവിടെ പോസ്റ്റ് ചെയ്യുന്ന അഭിപ്രായങ്ങൾ മനോരമയുടേതല്ല. അഭിപ്രായങ്ങളുടെ പൂർണ്ണ ഉത്തരവാദിത്തം രചയിതാവിനായിരിക്കും. കേന്ദ്ര സർക്കാറിന്റെ ഐടി നയപ്രകാരം വ്യക്തി, സമുദായം, മതം, രാജ്യം എന്നിവയ്ക്കെതിരായി അധിക്ഷേപങ്ങളും അശ്ലീല പദപ്രയോഗങ്ങളും നടത്തുന്നത് ശിക്ഷാർഹമായ കുറ്റമാണ്. ഇത്തരം അഭിപ്രായ പ്രകടനത്തിന് നിയമനടപടി കൈക്കൊള്ളുന്നതാണ്.