ആശുപത്രിയിൽനിന്നു ബൂത്തിലേക്ക്; കന്നിവോട്ട് ചെയ്ത് മുഹമ്മദ് ഹാഷിം
Mail This Article
മാന്നാർ ∙ പരുമലയിലെ സ്വകാര്യ ആശുപത്രിയിൽനിന്നു നേരെ പോളിങ് ബൂത്തിലേക്കായിരുന്നു മുഹമ്മദ് ഹാഷിമിന്റെ (18) യാത്ര; കന്നി വോട്ട് ചെയ്യാൻ. അപകടത്തെ തുടർന്നു ശസ്ത്രക്രിയ കഴിഞ്ഞ കാൽ വീൽചെയറിൽ ഒതുക്കിവച്ചാണു റാംപിലൂടെ ഹാഷിം പോളിങ് ബൂത്തിലെത്തിയത്.ഒന്നര വർഷം മുൻപു ബൈക്കുകൾ കൂട്ടിയിടിച്ച് ഒരു ബൈക്ക് ഹാഷിമിന്റെ കാലിലേക്കു വീണ് എല്ലു പൊട്ടിയിരുന്നു.
ശസ്ത്രക്രിയ നടത്തി കമ്പിയിട്ടു. അടുത്തിടെ പ്ലസ് ടു പരീക്ഷയുടെ സമയത്തു കാലിനു വേദനയുണ്ടായി. കമ്പി നീക്കാമെന്നു ഡോക്ടർ നിർദേശിച്ചു. അതിനായി ആശുപത്രിയിൽ പ്രവേശിപ്പിച്ചിരിക്കുകയായിരുന്നു. ഇന്നലെ വോട്ട് ചെയ്യാനായി ഡിസ്ചാർജ് വാങ്ങി.തിരുവല്ല സെന്റ് മേരീസ് സ്കൂളിലാണു ഹാഷിം പഠിച്ചിരുന്നത്. സേവാദൾ ജില്ലാ വൈസ് ചെയർമാനും വ്യാപാരിയുമായ ടി.എസ്.ഷഫീഖിന്റെയും സജീനയുടെയും മകൻ. മാതാപിതാക്കളാണു കാറിൽ ഹാഷിമിനെ ബൂത്തിലെത്തിച്ചത്.