ഥാറും ഗൂർഖയും വീണ്ടും; ഇത്തവണ മത്സരം 5 ഡോർ വിഭാഗത്തിൽ

ഗൂര്‍ഖ 5 ഡോര്‍ എസ്‌യുവിയുടെ ചിത്രങ്ങള്‍ പുറത്തുവിട്ട് ഫോഴ്‌സ് മോട്ടോഴ്‌സ്. ഈ വര്‍ഷം പകുതിയോടെ ഇന്ത്യയില്‍ പുറത്തിറങ്ങുമെന്നു പ്രതീക്ഷിക്കുന്ന ഗൂര്‍ഖ 5 ഡോര്‍ എസ്‌യുവിയുടെ പ്രധാന എതിരാളി മഹീന്ദ്ര ഥാര്‍ അര്‍മദയാണ്. നിലവിലുള്ള ഗൂര്‍ഖയുടെ 3 ഡോര്‍ മോഡല്‍ പുറത്തിറങ്ങി മൂന്നു വര്‍ഷത്തിനു ശേഷമാണ് ഫോഴ്‌സ് മോട്ടോര്‍ 5 ഡോര്‍ ഗൂര്‍ഖയുമായി എത്തിയിരിക്കുന്നത്. 

മുന്‍ തലമുറ ഗൂര്‍ഖ മൂന്നു ഡോര്‍, അഞ്ചു ഡോര്‍ ബോഡി സ്‌റ്റൈലുകളില്‍ എത്തിയിരുന്നു. എന്നാല്‍ ഇപ്പോഴത്തെ മോഡലില്‍ മൂന്നു ഡോര്‍ മാത്രമാണുണ്ടായിരുന്നത്. ഈ പ്രശ്‌നത്തിനുള്ള പരിഹാരമായാണ് അഞ്ചു ഡോര്‍ ഗൂര്‍ഖയുടെ വരവ്. ഡോറുകളിലുള്ള വ്യത്യാസത്തിനു പുറത്ത് ചെറിയ രൂപ മാറ്റങ്ങള്‍ മാത്രമാണ് 3 ഡോര്‍ മോഡലില്‍ നിന്നു ഉണ്ടാകുക.

ഗൂര്‍ഖയുടെ ബോക്‌സി ഡിസൈന്‍ മെഴ്‌സിഡീസ് ബെന്‍സ് ജി ക്ലാസിനെ ഓര്‍മിപ്പിക്കുന്നുണ്ട്. വട്ടത്തിലുള്ള ഹെഡ്‌ലാംപുകള്‍ക്കു പകരം ചതുരത്തിലുള്ള ഹെഡ്‌ലാംപുകളാണ് ഗൂര്‍ക്ക 5 ഡോറിലുണ്ടാവുക. പുറംരൂപത്തെ കൂടുതല്‍ മിഴിവുറ്റതാക്കുന്നുണ്ട് 18 ഇഞ്ച് ഡയമണ്ട് കട്ട് അലോയ് വീലുകള്‍.

4 വീല്‍ ഡ്രൈവ് ഓപ്ഷന്‍ ഗൂര്‍ക്ക 5 ഡോറിലുണ്ട്. 3 ഡോര്‍ മോഡലിൽ മാനുവല്‍ ഡിഫ് ലോക്ക് ലിവറുകളാണെങ്കില്‍ 4 വീല്‍ ഡ്രൈവിന് പ്രത്യേകം നോബ് നല്‍കിയിരിക്കുന്നു. 5 സീറ്റര്‍, 6 സീറ്റര്‍, 7 സീറ്റര്‍ കോണ്‍ഫിഗറേഷനുകളില്‍ ഗൂര്‍ക്ക 5 ഡോര്‍ എത്തും. ഇത് ഉപഭോക്താക്കള്‍ക്ക് തിരഞ്ഞെടുക്കാനുള്ള കൂടുതല്‍ ഓപ്ഷനുകള്‍ നല്‍കും. വീല്‍ സ്‌പേസ് 425എംഎം കൂടിയിട്ടുണ്ട്. അതുകൊണ്ടുതന്നെ കൂടുതല്‍ വിശാലമായ ഇന്റീരിയര്‍ സ്‌പേസും 5ഡോര്‍ ഗൂര്‍ക്കയിലുണ്ടാവും.

3 ഡോര്‍ ഗൂര്‍ഖയിലെ 2.6 ലീറ്റര്‍ ഡീസല്‍ എന്‍ജിന്‍ തന്നെയാവും 5 ഡോര്‍ ഗൂര്‍ഖയിലും ഉണ്ടാവുക. 5 സ്പീഡ് മാനുവല്‍ ഗിയര്‍ ബോക്‌സാണ് എന്‍ജിനുമായി ബന്ധിപ്പിച്ചിരിക്കുന്നത്. എപ്പോള്‍ പുറത്തിറങ്ങുമെന്നും എത്ര വിലയാവുമെന്നും സംബന്ധിച്ച സൂചനകളുമുണ്ട്. അടുത്ത സാമ്പത്തികവര്‍ഷത്തിന്റെ ആദ്യ പാദത്തില്‍(2024 ഏപ്രില്‍- ജൂണ്‍) ഗൂര്‍ഖ 5 ഡോര്‍ എത്തുമെന്നാണ് സൂചന. ഗൂര്‍ഖ 3 ഡോറിന് 15.10 ലക്ഷം രൂപയാണ് വില. 5 ഡോര്‍ ഗൂര്‍ഖക്ക് ഏകദേശം ഒന്നര ലക്ഷം രൂപയോളം കൂടുതല്‍ വില പ്രതീക്ഷിക്കാം.

മഹീന്ദ്ര ഥാര്‍ അര്‍മദ

ജനപ്രിയ ഓഫ്‌റോഡറായ ഥാറിന്റെ 5 ഡോര്‍ മോഡൽ, അര്‍മദയെ മഹീന്ദ്ര പുറത്തിറക്കാന്‍ തയാറെടുക്കുകയാണ്. ഗൂര്‍ഖയുടെ പ്രധാന എതിരാളി അര്‍മദയായിരിക്കും. ജൂണ്‍-ഓഗസ്റ്റ് ആകുമ്പോഴേക്കും അര്‍മദയെ പുറത്തിറക്കാനാണ് മഹീന്ദ്രയുടെ ശ്രമം. 3 ഡോര്‍ ഥാറിനെ അപേക്ഷിച്ച് കൂടുതല്‍ വലുപ്പമുള്ള വാഹനമായിരിക്കും സ്വാഭാവികമായും 5 ഡോര്‍ ഥാര്‍ അര്‍മദ.

ഗൂര്‍ഖയിലേതു പോലെ ചെറിയ മാറ്റങ്ങള്‍ മാത്രമേ 3 ഡോര്‍ ഥാറിനെ അപേക്ഷിച്ച് അര്‍മദയുടെ എക്‌സ്റ്റീരിയറില്‍ പ്രതീക്ഷിക്കേണ്ടതുള്ളൂ. 19 ഇഞ്ച് അലോയ് വീലുകളായിരിക്കും ഇതില്‍ പ്രധാനം. ഇന്റീരിയറിന്റെ നിറം 3ഡോറിലെ സമ്പൂര്‍ണ കറുപ്പില്‍ നിന്നും അര്‍മദയിലേക്കെത്തുമ്പോള്‍ ഇളം തവിട്ട്-കറുപ്പ് ആയി മാറും. കൂടുതല്‍ വലിയ 10.25 ഇഞ്ച് ഇന്‍ഫോടെയിന്‍മെന്റ് സിസ്റ്റവും മുന്നില്‍ എല്‍ഇഡി സെറ്റ് അപ്പും പ്രതീക്ഷിക്കാം.

3 ഡോര്‍ ഥാറില്‍ 150 എച്ച്പി കരുത്തും പരമാവധി 320എന്‍എം ടോര്‍ക്കും പുറത്തെടുക്കുന്ന 2.0 ലീറ്റര്‍ പെട്രോള്‍ എന്‍ജിന്‍, 130 എച്ച്പി കരുത്തും പരമാവധി 300 എന്‍എം ടോര്‍ക്കും പുറത്തെടുക്കുന്ന 2.2 ലീറ്റര്‍ ഡീസല്‍ എന്‍ജിന്‍ ഓപ്ഷനുകളാണുള്ളത്. ഇതേ എന്‍ജിനുകളിലായിരിക്കും അര്‍മദയും എത്തുക. 6 സ്പീഡ് മാനുവല്‍ അല്ലെങ്കില്‍ 6 സ്പീഡ് ഓട്ടോമാറ്റിക് ട്രാസ്മിഷനുകളാണ് എന്‍ജിനുമായി ബന്ധിപ്പിക്കുക.