മമത – ദിവ്യ ബോസ് എഴുതിയ കവിത
Mail This Article
മനസ്സറിയണമെങ്കിൽ മനസ്സ് വായിക്കാൻ അറിയണം
വായിച്ചാൽ മാത്രം പോര മനസ്സിലാക്കാനുമറിയണം.
ഏകാകിയായ ഒരു മനസ്സിനെന്നും വിരഹമാണ്.
ആൾക്കൂട്ടത്തിനിടയിലും തിരക്കുജീവിതത്തിനിടയിലും
അതിന് വിരഹമാണ്.
നികത്താനാവാത്ത വിരഹം!!!!
നികത്തണമെന്നൊരു ചിന്തയും ആ മനസ്സിനില്ല.
ഇടയ്ക്കെപ്പോഴൊ കയറി വന്നൊരുവളുണ്ട്
അവൾക്കെന്തോ ഒരു മമതയുമുണ്ട്
കാരണമറിയാത്ത ആ മമതയെക്കുറിച്ച്
ആ മനസ്സും ഇടയ്ക്ക് ചിന്തിക്കാറുണ്ട്
തിരക്കുള്ള ജീവിതത്തിൽ - മമതയെങ്കിലും....
എന്തിനോ... വേണ്ടി വച്ചുനീട്ടുന്നൊരുവൾ
ലാങ്കി ലാങ്കി പൂവുകൾക്ക് വിഷാദത്തിന്റെ മഞ്ഞനിറമായത്
നീലവരകളിൽ ഒരു സ്നേഹസ്പർശത്തിന് പോലും..
ആരുമില്ലാതായപ്പോളാണ്.
അവശേഷിപ്പുകളുടെ നേർത്ത നിശ്വാസം
ആ നീല വരകളിൽ ചെറുതായി തുടിക്കാറുണ്ട്
വള്ളിപ്പടർപ്പുകളോളം പിണഞ്ഞാലും ദാഹം മാറാത്തത്
ആ മനസ്സറിയുന്നുണ്ടാവുമോ എന്നോർത്ത രാവിൽ..
മുറ്റത്ത് നനുത്ത മഴ തണുത്ത കളങ്ങൾ വരച്ചു.