ഇംഫാൽ∙ ഐ ലീഗ് ഫുട്ബോളിൽ നിലവിലെ ചാംപ്യന്മാരായ മിനർവ പഞ്ചാബ് എഫ്സിയും മണിപ്പൂർ ടീം നെരോക എഫ്സിയും തമ്മിൽ നടന്ന ആവേശപ്പോരാട്ടത്തിനു ഗോൾരഹിത സമനില. കളിയിൽ മേധാവിത്വം പുലർത്തിയ നെരോകയ്ക്ക് അനുകൂലമായി ലഭിച്ച പെനൽറ്റി ലക്ഷ്യത്തിലെത്തിക്കാനുമായില്ല. 9 കളിയിൽ 15 പോയിന്റുമായി നാലാമതാണു നെരോക. 10 കളിയിൽ 13 പോയിന്റുമായി മിനർവ ആറാമത്.
ബഗാന് വിജയം
കൊൽക്കത്ത∙ ഐ ലീഗ് ഫുട്ബോൾ പോയിന്റ് പട്ടികയിലെ അവസാന സ്ഥാനക്കാരായ ഷില്ലോങ് ലങോജ് എഫ്സിയെ 2–0ന് തോൽപിച്ച് കൊൽക്കത്ത ക്ലബ് മോഹൻ ബഗാൻ സ്വന്തം മൈതാനത്ത് സീസണിലെ ആദ്യജയം സ്വന്തമാക്കി. യുറ്റ കിനോവാകി , ഹെൻറി കിസേക്ക എന്നിവരാണു സ്കോറർമാർ.
×
