ചൈനീസ് പ്രസിഡന്റിന് പാരിസിൽ വരവേൽപ്

പാരിസ് ∙ അപൂർവമായ യൂറോപ്പ് പര്യടനത്തിനു കുടുംബസമേതമെത്തിയ ചൈനയുടെ പ്രസിഡന്റ് ഷി ചിൻപിങ് ഫ്രാൻസിൽ ആദ്യസ്വീകരണം. പാരിസിൽ, ഔദ്യോഗിക വസതിയായ എലീസെ കൊട്ടാരത്തിൽ ഫ്രഞ്ച് പ്രസിഡന്റ് ഇമ്മാനുവൽ മക്രോ ഷിയെ വരവേറ്റു. കഴിഞ്ഞ വർഷം ഏപ്രിലിൽ മക്രോ ചൈന സന്ദർശിച്ചിരുന്നു.

സന്ദർശനം ചൈന–യൂറോപ്പ് വ്യാപാര തർക്കങ്ങളുടെ ചർച്ചയും പരിഹാരവും കൂടി ലക്ഷ്യമിട്ടുള്ളതാണ്. യൂറോപ്യൻ കമ്മിഷൻ പ്രസിഡന്റ് ഉർസുല വോൺഡെർ ലെയെനുമായും ഷി കൂടിക്കാഴ്ച നടത്തി. ഫ്രാൻസിൽ രണ്ടുദിവസം തങ്ങിയശേഷം സെർബിയ, ഹംഗറി എന്നീ രാജ്യങ്ങൾ സന്ദർശിക്കും. റഷ്യയുമായി അടുപ്പമുള്ള യൂറോപ്യൻ രാജ്യങ്ങളാണിവ.