വടക്കഞ്ചേരി മേൽപാലം: പാലക്കാട് ഭാഗത്തേക്കുള്ളത് തുറന്നപ്പോള് തൃശൂര് ദിശയിലേക്കുള്ളത് അടച്ചു
Mail This Article
വടക്കഞ്ചേരി∙ മണ്ണുത്തി-വടക്കഞ്ചേരി ദേശീയപാതയിലെ വടക്കഞ്ചേരി മേൽപാലത്തിൽ പാലക്കാട് ദിശയിലേക്കുള്ള പാലത്തിന്റെ തകർന്ന ഭാഗങ്ങൾ നന്നാക്കി തുറന്നു കൊടുത്തപ്പോള് തൃശൂര് ഭാഗത്തേക്കുള്ള പാലം അടച്ചു. അവിടെ തകരാറിലായ ജോയിന്റുകൾ കുത്തിപ്പൊളിച്ചു കോൺക്രീറ്റിങ് നടത്തുകയാണിപ്പോൾ. പാലക്കാട് ദിശയിലേക്കുള്ള പാലത്തിലൂടെയാണ് ഇരു ഭാഗത്തേക്കും വാഹനങ്ങൾ കടത്തിവിടുന്നത്.
ഇവിടെ സ്ഥാപിച്ചിരിക്കുന്ന ദിശാ ബോര്ഡുകളില് റിഫ്ലക്ടറുകളും മതിയായ സിഗ്നല് സംവിധാനങ്ങളും ഇല്ലാത്തത് അപകടങ്ങള് ഉണ്ടാക്കുന്നതായി പരാതിയുണ്ട്. ഇതുവരെ 64 പ്രാവശ്യം ജോയിന്റുകള് കുത്തിപ്പൊളിച്ചു നിര്മാണം നടത്തിയിട്ടും പാലത്തിന്റെ പ്രശ്നം പരിഹരിക്കാനായില്ല. ദേശീയപാത അതോറിറ്റിയോ റോഡ് സേഫ്റ്റി അധികൃതരോ ഇതു കാണുന്നില്ലെന്ന് ആരോപണമുണ്ട്.
പാലത്തിന്റെ രണ്ട് ബീമുകൾ തമ്മിൽ ചേരുന്ന ഭാഗത്തു വാഹനങ്ങൾ പോകുമ്പോൾ വലിയ ശബ്ദത്തിൽ കുലുക്കം ഉണ്ടാകുന്നുണ്ട്. 420 മീറ്റർ നീളമുള്ളതാണു മേല്പാലം. പാലത്തിന്റെ നിര്മാണം സംബന്ധിച്ച് വിദഗ്ധ സമിതി അന്വേഷണം നടത്തണമെന്ന ആവശ്യം ശക്തമാണ്.