ഡിജിറ്റൽ സർവകലാശാലയിൽ പിജി, പിഎച്ച്ഡി പ്രവേശനം

‘ഡിജിറ്റൽ യൂണിവേഴ്സിറ്റി ഓഫ് കേരള’ 2024 ലെ പിജി, പിഎച്ച്ഡി പ്രവേശനത്തിന് ഓൺലൈൻ അപേക്ഷ 15 വരെ സ്വീകരിക്കും. Digital University Kerala, Technocity Campus, Mangalapuram, Thonnakkal, Thiruvananthapuram– 695317; ഫോൺ: 8078193800, ഇ–മെയിൽ: admission-pg@duk.ac.in / admission-phd@duk.ac.in: വെബ്: https://duk.ac.in/admission.

പ്രോഗ്രാമുകൾ
1 എംടെക്: 60% എങ്കിലും മാർക്കോടെ പ്രസക്ത ബിടെക് /എംഎസ്‌സി/എംസിഎ ജയിച്ചവർക്ക് അവസരം. കംപ്യൂട്ടർ സയൻസ് ആൻഡ് എൻജിനീയറിങ്, ഇലക്ട്രോണിക്സ് എൻജിനീയറിങ്, ഇലക്ട്രോണിക് പ്രോഡക്ട് ഡിസൈൻ എന്നിവയിൽ സ്പെഷലൈസ് ചെയ്യാം.
2 എംഎസ്‌സി: വിവിധ സ്പെഷലൈസേഷനുകളുടെ പ്രവേശനയോഗ്യതകൾ പ്രോസ്പെക്ടസിലുണ്ട്.
(എ) കംപ്യൂട്ടർ സയൻസ്– സ്പെഷലൈസേഷൻ: സൈബർ സെക്യൂരിറ്റി / മെഷീൻ ഇന്റലിജൻസ്/ ഡേറ്റ അനലിറ്റിക്സ്
(ബി) ഡേറ്റ അനലിറ്റിക്സ് ആൻഡ് ബയോ– ആർട്ടിഫിഷ്യൽ ഇന്റലിജൻസ്/ ഡേറ്റ അനലിറ്റിക്സ് ആൻഡ് കംപ്യൂട്ടേഷനൽ സയൻസ് / ഡേറ്റ അനലിറ്റിക്സ് ആൻഡ് ജിയോഇൻഫർമാറ്റിക്സ്/ ഇലക്ട്രോണിക്സ്/ അപ്ലൈഡ് ഫിസിക്സ്/ ഇക്കളോജി– ഇക്കളോജിക്കൽ ഇൻഫർമാറ്റിക്സ്/ ഇൻഫർമാറ്റിക്സ് (ഡിജിറ്റൽ ലീഡർഷിപ് ആൻഡ് ട്രാൻസ്ഫർമേഷൻ)
3 എംബിഎ– ബിസിനസ് അഡ്മിനിസ്ട്രേഷൻ (റഗുലർ പ്രോഗ്രാമും വർക്കിങ് പ്രഫഷനൽസിനുള്ള പ്രോഗ്രാമും)
4 പിജി ഡിപ്ലോമ ഇൻ എംആർഐ (മാഗ്നറ്റിക് റസണൻസ് ഇമേജിങ്) ടെക്നോളജി
5 പിഎച്ച്ഡി (ഫുൾ–ടൈം റഗുലർ / പാർട്ട്–ടൈം റഗുലർ / ഇൻഡസ്ട്രി റഗുലർ പ്രോഗ്രാമുകൾ)

പ്രവേശന രീതി ഇങ്ങനെ
എ) എംഎസ്‌സി /എംബിഎ: ഇനിപ്പറയുന്ന 2 പരീക്ഷകളിലൊന്നിലെ സ്കോർ വേണം.
1. എൻടിഎ നടത്തുന്ന സിയുഇടി (പിജി) 2024– https://pgcuet.samarth.ac.in.
2. ഡിജിറ്റൽ യൂണിവേഴ്സിറ്റി അഡ്മിഷൻ ടെസ്റ്റ് (DUAT-2024)
എംബിഎ പ്രവേശനത്തിന് CAT/ GRE /CMAT/ KMAT / XAT / ഗ്രാജ്വേറ്റ് മാനേജ്മെന്റ് കൗൺസിൽ നടത്തുന്ന NMAT അഥവാ GMAT ഇവയൊന്നിലെ സ്കോർ മതി.
ബി) എംടെക്: സിയുഇടി പിജി അഥവാ ഗേറ്റ് സ്കോർ വഴി പ്രവേശനം തേടാം. ഇതിനു പകരമായി സർവകലാശാലയിലെ ബന്ധപ്പെട്ട സ്കൂളിന്റെ (വകുപ്പിന്റെ) പ്രവേശന രീതി സ്വീകരിക്കുകയുമാകാം.
സി) പിഎച്ച്ഡി: ഡിജിറ്റൽ യൂണിവേഴ്സിറ്റി നടത്തുന്ന റിസർച് ആപ്റ്റിറ്റ്യൂഡ് ടെസ്റ്റ് (DRAT) എഴുതണം. യുജിസി നെറ്റ് യോഗ്യതയുള്ളവർ DRAT എഴുതേണ്ട. പ്രാഥമിക സിലക്‌ഷനുള്ളവരെ ഇന്റർവ്യൂ ചെയ്ത് അന്തിമ തിരഞ്ഞെടുപ്പു നടത്തും.

പിജി പ്രോഗ്രാമുകളുടെ അപേക്ഷാഫീ 2 തരത്തിൽ: (1) DUAT/GATE വഴി അപേക്ഷിക്കാൻ 750 രുപ; പട്ടിക, ഭിന്നശേഷി വിഭാഗക്കാർ 375 രൂപ (2) സിയുഇടി–പിജി വഴി അപേക്ഷിക്കാൻ 100 രൂപ; പട്ടിക, ഭിന്നശേഷി വിഭാഗക്കാർ 50 രൂപ. https://duk.ac.in/admission/apply എന്ന സൈറ്റിലൂടെ അപേക്ഷ സമർപ്പിക്കാം.

പിജി / പിഎച്ച്ഡി എൻട്രൻസ് പരീക്ഷകൾ (ഡിയുഎടിയുടെ ആദ്യ ഫേസ് / ഡിആർഎടി): ഡിജിറ്റൽ സർവകലാശാല ജൂൺ 8നു നടത്തും. ഡിയുഎടി പ്രോക്ടേഡ് ഓൺലൈൻ രീതിയിലാണു നടത്തുക. 60 മിനിറ്റിൽ 60 ചോദ്യങ്ങൾക്ക് ഉത്തരം നൽകണം. ഡിയുഎടി പേപ്പറുകളുടെ സിലബസ് പ്രോസ്പെക്ടസിലുണ്ട്.
അപേക്ഷ 15 വരെ: സിയുഇടി–പിജി വഴിയുള്ള അപേക്ഷ 15 വരെ മാത്രമേ സ്വീകരിക്കൂ. ഡിയുഎടി വഴിയുള്ള അപേക്ഷ 25 വരെ സ്വീകരിക്കും.

ഫീസ്: എംടെക്, എംഎസ്‌സി പ്രോഗ്രാമുകൾക്കു 2 വർഷത്തേക്ക് ആകെ 2,10,000 രൂപ ഫീസ് നൽകണം. എംബിഎയ്ക്ക് 4,05,000 രൂപയും. പിഎച്ച്ഡി പ്രോഗ്രാമുകളുടെ ഫീസ് / സ്കോളർഷിപ് നിരക്കുകൾ പ്രോസ്പെക്ടസിൽ നൽകിയിട്ടുണ്ട്. പെൺകുട്ടികൾക്ക് ഹോസ്റ്റൽ സൗകര്യം ലഭിക്കും.

പിജി പ്രോഗ്രാം യോഗ്യത – പൊതുനിബന്ധന
60% മാർക്ക് അഥവാ 6.5/10 ഗ്രേഡ് പോയിന്റ് ആവറേജോടെ പ്രസക്ത ബാച്‌ലർ ബിരുദം. ഏതെങ്കിലും സർവകലാശാല 6.5/10 ആവറേജ് എന്നത് 60 ശതമാനത്തിൽ കൂടുതലായിട്ടാണ് പരിവർത്തനം ചെയ്യുന്നതെങ്കിൽ, 6.5 ൽ കുറഞ്ഞ ആവറേജും പ്രവേശനത്തിനു പരിഗണിക്കും. പക്ഷേ ആ മാനദണ്ഡത്തിന്റെ തെളിവ് പ്രവേശനവേളയിൽ ഹാജരാക്കണം. പട്ടിക, ഭിന്നശേഷി വിഭാഗക്കാർക്കു പാസ് മാർക്ക് മതി. കേരളത്തിലെ പിന്നാക്കവിഭാഗക്കാർക്കു 55% മാർക്കും.
മുൻ‌ സെമസ്റ്റർ/ വർഷ പരീക്ഷകളെല്ലാം ജയിച്ച്, ആദ്യമായി ഫൈനൽ സെമസ്റ്റർ/ വർഷ പരീക്ഷയെഴുതുന്നവർക്കും അപേക്ഷിക്കാം.