അജ്മാനിൽ നിന്ന് കാണാതായ കുട്ടിയുടെ മൃതദേഹം കണ്ടെത്തി; ആത്മഹത്യയെന്ന് സംശയം

അജ്മാൻ∙ അജ്മാനിൽ നിന്ന് മൂന്ന് ആഴ്ച മുൻപ് വീടുവിട്ടിറങ്ങിയ 17 വയസ്സുകാരനെ മരിച്ച നിലയിൽ കണ്ടെത്തിയതായി അജ്മാൻ പൊലീസ് അറിയിച്ചു. പാക്കിസ്ഥാൻ സ്വദേശി മുഹമ്മദ് മഷൂഖിന്‍റെ മകൻ ഇബ്രാഹിം മുഹമ്മദിനെയാണ് മരിച്ച നിലയിൽ കണ്ടെത്തിയത്. കഴിഞ്ഞ മാസം 12-ന് അജ്മാൻ അൽ റൗദ 1 ലെ വീട്ടിൽ നിന്നാണ് ഇബ്രാഹിം വീടുവിട്ടുപോയത്. പെരുന്നാൾ ആഘോഷങ്ങൾക്കിടെയായിരുന്നു ഇബ്രാഹിം മുഹമ്മദ് അപ്രത്യക്ഷനായത്. 

കുടുംബം നൽകിയ പരാതിയെ തുടർന്ന് നടത്തിയ തിരച്ചിലിലാണ് അൽ ഖോർ ടവറിനടുത്ത് ഇബ്രാഹിമിന്‍റെ മൃതദേഹം കണ്ടെത്തിയത്. ആത്മഹത്യയാണ് എന്നാണ് പ്രാഥമിക നിഗമനം . കുടുംബത്തിലെ രണ്ട് ആൺമക്കളിൽ മൂത്തവനായിരുന്നു ഇബ്രാഹിം മുഹമ്മദ്.