അന്ന് ‘ജയിലർ’, ഇന്നലെ ‘ആവേശം’: പ്രചാരണത്തിന്റെ ക്ഷീണമകറ്റാൻ ‘രംഗണ്ണനെ’ കണ്ട് ചാണ്ടി ഉമ്മൻ

പാലാ ∙ തിരഞ്ഞെടുപ്പ് പ്രചാരണത്തിന്റെ ക്ഷീണമകറ്റാൻ ചാണ്ടി ഉമ്മൻ എംഎൽഎ 130 പ്രവർത്തകരുമായി ‘ആവേശം’ കാണാൻ പുത്തേട്ട് സിനിമാസിലെത്തി. തിരഞ്ഞെടുപ്പിന്റെ മുൻനിരയിൽ നിന്ന് പ്രവർത്തിച്ച പ്രവർത്തകർക്കൊപ്പമാണ് ചാണ്ടി ഉമ്മൻ എംഎൽഎ എത്തിയത്. യുഡിഎഫ് ഏറ്റവും അധികം ഭൂരിപക്ഷം പ്രതീക്ഷിക്കുന്ന മണ്ഡലങ്ങളിൽ ഒന്നായ പുതുപ്പള്ളിയിൽ ചാണ്ടി ഉമ്മന്റെ നേതൃത്വത്തിൽ മണ്ഡലത്തെ ഇളക്കി മറിച്ചുള്ള പ്രചാരണമാണ് നടത്തിയത്. 

ഫഹദ് ഫാസിൽ ചിത്രമായ ആവേശം കാണാൻ ഇന്നലെ രാവിലെ 10.30ന് ആണ് ചാണ്ടി ഉമ്മനും പ്രവർത്തകരും എത്തിയത്. മുൻപ് പുതുപ്പള്ളി ഉപതിരഞ്ഞെടുപ്പിനു പിറ്റേന്ന് ജയിലർ സിനിമ കാണാനും ചാണ്ടി ഉമ്മൻ എത്തിയിരുന്നു.