കഞ്ചാവ് ഉപയോഗിക്കുന്നതിനിടെ 6 യുവാക്കള്‍ പിടിയിൽ
Mail This Article
പേരാമ്പ്ര∙ കഞ്ചാവ് ഉപയോഗിക്കുന്നതിനിടെ 6 യുവാക്കള്‍ പിടിയിൽ. തിരുവള്ളൂർ സ്വദേശികളായ നാറാണത്ത് അർഷാദ്, തെക്കേകണ്ണമ്പള്ളി യാക്കൂബ്, ചെറുകുനിയിൽ മുനീർ, കൈതക്കൽ നൊച്ചാട് നെല്ലുവേലി വീട്ടിൽ താമസിക്കുന്ന ഈരാറ്റുപേട്ട സ്വദേശി യൂസഫ്, വെള്ളിയൂർ കൊളപ്പോട്ടിൽ വീട്ടിൽ ശ്രീനാഥ്, വെള്ളിയൂർ വെള്ളരിയിൽ വീട്ടിൽ അജിൽ ജെ. മനോജ് എന്നിവരാണ് പിടിയിലായത്. ഇവരിൽ നിന്നും ലഹരി ഉപയോഗിക്കുന്ന പേപ്പറുകളും പൈപ്പുകളും കണ്ടെടുത്തു.
പേരാമ്പ്ര ഡിവൈഎസ്പി കെ.എം.ബിജുവിന് ലഭിച്ച രഹസ്യവിവരത്തിന്റെ അടിസ്ഥാനത്തിലും ലഹരി ഉപയോഗിക്കാൻ യുവാക്കള്‍ തമ്പടിക്കുന്ന സ്ഥലങ്ങൾ കേന്ദ്രീകരിച്ചും ഡിവൈഎസ്പി സ്ക്വാഡ് നടത്തിയ തിരച്ചിലിലാണ് ഇവർ പിടിയിലായത്. ഇവർക്കെതിരെ 4 കേസുകൾ റജിസ്റ്റർ ചെയ്തു. പിടിയിലായവരിൽ ചിലർ മുൻപും സമാനമായ കേസുകളിൽ പ്രതികളാണെന്ന് പൊലീസ് പറഞ്ഞു.
ജില്ലയിൽ ഈ വർഷം മാത്രം ലഹരി ഉപയോഗിച്ച് അഞ്ചിലധികം യുവാക്കൾ മരിച്ചതിന്റെ അടിസ്ഥാനത്തിൽ കോഴിക്കോട് റൂറൽ ജില്ലാ പൊലീസ് മേധാവി അർവിന്ദ് സുകുമാറിന്റെ നിർദേശപ്രകാരം നടപടികൾ ശക്തമാക്കിയിട്ടുണ്ടെന്നും ലഹരി വസ്തുക്കളുടെ വിൽപനയ്ക്കും ഉപയോഗത്തിനുമെതിരെ റെയ്ഡും മറ്റു ശക്തമായ നടപടികളും സ്വീകരിക്കുമെന്നും പേരാമ്പ്ര ഡിവൈഎസ്പി അറിയിച്ചു.
