രാഹുൽ ഗാന്ധിയുടെ റായ്ബറേലിയിലെ സ്ഥാനാർഥിത്വം വയനാടൻ ജനതയോടുള്ള അവഹേളനം: സിപിഐ
Mail This Article
കല്പറ്റ∙ വയനാടിനെ കൂടെ നിർത്തുമെന്ന് പറഞ്ഞ് മണ്ഡലത്തില് വന്നു മത്സരിക്കുകയും ഇവിടത്തെ തിരഞ്ഞെടുപ്പ് കഴിയുന്നതുവരെ വരെ കാത്തിരിക്കുകയും ചെയ്ത ശേഷം റായ്ബറേലിയിൽ മത്സര രംഗത്തുവന്ന രാഹുൽ ഗാന്ധിയുടെ നടപടി വയനാടൻ ജനതയോടുള്ള അവഹേളനമാണെന്ന് സിപിഐ ജില്ലാ എക്സിക്യൂട്ടീവ്. തിരഞ്ഞെടുപ്പ് സമയത്ത് രണ്ടു മണ്ഡലങ്ങളിൽ മത്സരിക്കുമെന്ന് പറയാതെ ഇവിടത്തെ മത്സരം കഴിഞ്ഞശേഷം ഉത്തരേന്ത്യയിൽ മത്സര രംഗത്തു വന്നത് ഭീരുത്വം കൊണ്ടാണ്.
വയനാട്ടിൽ ജയസാധ്യത ഉണ്ടെങ്കിൽ എന്തുകൊണ്ട് മറ്റൊരു മണ്ഡലത്തിൽ കൂടി മത്സരിക്കുന്നു എന്ന കാര്യം വ്യക്തമാക്കാൻ യുഡിഎഫ് തയാറാകണം. അഥവാ രണ്ടു മണ്ഡലങ്ങളും വിജയിച്ചു കഴിഞ്ഞാൽ ഏതു മണ്ഡലം നിലനിർത്തുമെന്ന് മുൻകൂട്ടി പറയാൻ ധൈര്യം കാണിക്കണം. രാഹുൽ ഗാന്ധിയുടെ നടപടി വയനാട്ടിലെ ജനങ്ങളോടുള്ള വെല്ലുവിളിയും പരിഹസിക്കലുമാണെന്നും സിപിഐ പ്രസ്താവനയില് പറഞ്ഞു.