മരിച്ചവരുടെ ഭാഷ – ദീപ നായർ ബാംഗ്ലൂർ എഴുതിയ കവിത

മരിച്ചവരുടെ ഭാഷ പഠിക്കാൻ ശ്രമിക്കവേ ഞാനറിഞ്ഞു

മൗനമായവരെന്നോടു സംവദിക്കുന്നു

ആർക്കും വായിച്ചെടുക്കാൻ കഴിയാത്ത ഭാഷ

നെഞ്ചിലെരിയും നോവിൽ പിടഞ്ഞുമരിച്ചവർ

ജീവിതവീഥിയിൽ കാലിടറി വീണുമരിച്ചവർ

തീവ്രപ്രണയം മുറിവേൽപ്പിച്ചു കൊന്നവർ
 

ഗദ്ഗദക്കുരുക്കിൽ വാക്കുകൾകുടുങ്ങി മരിച്ചവർ

ജീവിതവിരക്തിയാൽ മരണത്തെ സ്വയംവരിച്ചവർ

വാക്ശരങ്ങൾ ആഞ്ഞുതറച്ചു മരിച്ചവർ

കൂടിയ ആത്മാർഥത തൂക്കിലേറ്റിയവർ

ചതിയുടെ ചുടുകാട്ടിൽ വെന്തുവെണ്ണീറായവർ

അപവാദപ്രചരണം കഴുവിലേറ്റിയവർ
 

രോഗപീഢകൾ പാതിവഴിയിൽ ഉപേക്ഷിച്ച പ്രാണനുകൾ

അപകടങ്ങൾ അകാലത്തിൽപൊലിച്ച ജീവനുകൾ

മരണത്തെ ഗാഢമായി പ്രണയിച്ചാശ്ലേഷിച്ചവർ

ഒടുവിലായ് കഥയിലും കവിതയിലും ജീവിക്കുന്നവർ

എല്ലാരും പറയുന്നതൊരു ഭാഷ, മൗനത്തിന്റെ ഭാഷ

ആയിരമർഥങ്ങൾ ഗർഭം ധരിച്ച മരിച്ചവരുടെ ഭാഷ