ഓട്ടോ ഡ്രൈവർ മരിച്ച അപകടം: 32 ലക്ഷം നഷ്ടപരിഹാരം നൽകണം

കോട്ടയം ∙ ഓട്ടോയും കാറും കൂട്ടിയിടിച്ച് ഓട്ടോ ഡ്രൈവർ മരിച്ച കേസിൽ ഓട്ടോ ഡ്രൈവറുടെ മാതാവിനും ഭാര്യയ്ക്കും 32 ലക്ഷം രൂപ നഷ്ടപരിഹാരം. അഡീഷനൽ മോട്ടർ ആക്സിഡന്റ് ട്രൈബ്യൂണൽ ആൻഡ് അഡീഷനൽ ജില്ലാ ജഡ്ജി സാനു എസ്.പണിക്കർ ആണ് ഉത്തരവിട്ടത്. 

2019 മേയ് 13ന് തിരുവല്ല - പന്തളം റോഡിൽ പ്രാവിൻകൂട് ജംക്‌ഷനു സമീപമായിരുന്നു അപകടം. തിരുവല്ല അഴിയിടത്തുചിറ ചിറായിൽ കിഷോർ കുമാർ (50) ഓടിച്ചിരുന്ന ഓട്ടോയിൽ എതിരേവന്ന കാർ ഇടിക്കുകയായിരുന്നു. 

നഷ്ടപരിഹാരത്തുക കാറിന്റെ ഇൻഷുറൻസ് കമ്പനി 30 ദിവസങ്ങൾക്കുള്ളിൽ ഹർജിക്കാർക്കു രണ്ടുപേർക്കും തുല്യമായി നൽകണമെന്നു കോടതി ഉത്തരവുണ്ട്. ഹർജിക്കാർക്കുവേണ്ടി അഡ്വ. പി.രാജീവ് ഹാജരായി.