മകരച്ചാൽ പാടത്ത് കർഷകരുടെ കണ്ണീർ; കൂട്ടിയിട്ടിരിക്കുന്നത് 850 ക്വിന്റൽ നെല്ല്

എടത്വ∙ തലവടി കൃഷി ഭവൻ പരിധിയിൽ‌ വരുന്ന മകരച്ചാലിൽ പാടത്ത് 56 ഏക്കറിലെ നെല്ല് കൊയ്തു 18 ദിവസമായിട്ടും സംഭരിച്ചില്ല. അമിത തുക പാട്ടം നൽകിയാണു കൃഷിയിറക്കിയതെന്നു നിരണം സ്വദേശി ഏഴുപറയിൽ എ.ആർ.അനിൽ പറയുന്നു. ഏകദേശം 850 ക്വിന്റൽ നെല്ലാണ് പാടത്ത് വിവിധ സ്ഥലങ്ങളിലായി കൂട്ടിയിട്ടിരിക്കുന്നത്. 

രണ്ടു മില്ലുകാർ സംഭരിക്കാമെന്നു പറഞ്ഞ് എത്തിയെങ്കിലും സംഭരിക്കാൻ തയാറായില്ല. വിളവ് കുറഞ്ഞതും ചുരുങ്ങിയതുമായ അളവ് 6.5% ആണ്. അത് 3% ആകാവൂ എന്നാണു വ്യവസ്ഥ. കിഴിവ് കൊടുക്കാൻ തയാറാണെന്നും എന്നിട്ടും നെല്ല് സംഭരിക്കുന്നില്ലെന്നാണു കർഷകൻ പറയുന്നത്. വൈകിട്ടു മഴ പെയ്യുന്നതു കാരണം കറവൽ കൂടുന്ന സ്ഥിതിയാണ്. നെല്ല് ഉണക്കാൻ മാത്രം ദിവസം 3000 രൂപ കൂലി നൽകണമെന്നും അനിൽ പറയുന്നു.