ബ്രിട്നി സ്പിയേഴ്സ് – സാം അസ്ഗരി ബന്ധം പിരിഞ്ഞു

ലൊസാഞ്ചലസ് ∙ 2 വർഷം മാത്രം നീണ്ട ദാമ്പത്യത്തിനൊടുവിൽ പോപ് സൂപ്പർ താരവും ഗായികയുമായ ബ്രിട്നി സ്പിയേഴ്സും (42) നടനും മോഡലുമായ സാം അസ്ഗരിയും (30) പിരിഞ്ഞു. സ്വത്തുക്കൾ പങ്കുവയ്ക്കാനും ധാരണയായി. 6 വർഷത്തെ പ്രണയത്തിനൊടുവിൽ 2022 ൽ ആയിരുന്നു ഇറാനിയൻ വംശജനായ അസ്ഗരിയുമായുള്ള വിവാഹം. ഈ ബന്ധത്തി‍ൽ കുട്ടികളില്ല. 

വാർത്തകളിൽ നിറഞ്ഞു നിന്ന ബ്രിട്നി സ്പിയേഴ്സിന്റെ മൂന്നാമത്തെ വിവാഹമാണിത്. അസ്ഗരിയുടെ ആദ്യത്തേതും. ബാല്യകാല സുഹൃത്ത് ജാസൻ അലക്സാണ്ടറുമായുള്ള ബ്രിട്നിയുടെ ആദ്യ വിവാഹം 3 ദിവസം മാത്രമാണു നീണ്ടത്. പിന്നീട് അമേരിക്കൻ ഡാൻസറായ കെവിൻ ഫെഡർലൈനെ വിവാഹം ചെയ്തു. ഈ ബന്ധത്തിൽ 2 ആൺകുട്ടികളുണ്ട്.