ആലപ്പുഴ ജില്ലയിൽ ശക്തമായ വേനൽമഴ ലഭിക്കുമെന്ന് കാലാവസ്ഥാ വിഭാഗം
![alappuzha-boat കടൽ കാൽച്ചുവട്ടിൽ ആലപ്പുഴ ബീച്ചിൽ പുതിയ പാലം നിർമിക്കുന്നതിനു മുന്നോടിയായുള്ള മണ്ണുപരിശോധനയുടെ ഭാഗമായുള്ള പൈലിങ്ങിനായി പ്ലാറ്റ്ഫോം തയാറാക്കാൻ കടലിൽ തെങ്ങിൻകുറ്റികൾ സ്ഥാപിക്കുന്ന തൊഴിലാളികൾ. ആലപ്പുഴ– മുസിരിസ് പൈതൃക പദ്ധതിയുടെ ഭാഗമായി 20 കോടി രൂപ ചെലവിലാണു കടൽപാലം നിർമിക്കുന്നത്. 5.5 മീറ്റർ വീതിയും 300 മീറ്റർ നീളവുമുള്ളതാകും പുതിയ കടൽപാലം. ഇൻകെലിനാണു നിർമാണത്തിന്റെ മേൽനോട്ടച്ചുമതല. പഴയ കടൽപാലത്തിന്റെ തൂണുകൾ കൂടുതൽ തുരുമ്പിക്കാത്ത വിധം രാസപ്രക്രിയ നടത്തി സംരക്ഷിച്ചു നിലനിർത്തും. ചിത്രം: സജിത്ത് ബാബു / മനോരമ](https://img-mm.manoramaonline.com/content/dam/mm/mo/district-news/alappuzha/images/2024/5/15/alappuzha-boat.jpg?w=1120&h=583)
Mail This Article
ആലപ്പുഴ∙ ജില്ലയിൽ അടുത്ത ദിവസങ്ങളിൽ ശക്തമായ വേനൽമഴ ലഭിച്ചേക്കുമെന്നു കാലാവസ്ഥാ വിദഗ്ധർ. ജില്ലയിൽ മിക്കയിടത്തും വേനൽ മഴയ്ക്കാവശ്യമായ മേഘങ്ങൾ ഉണ്ടാകുന്നുണ്ട്. അതിനാലാണ് ഉച്ചയോടെ അന്തരീക്ഷത്തിൽ മേഘങ്ങൾ നിറഞ്ഞു സൂര്യപ്രകാശം മറയ്ക്കുന്നത്. എന്നാൽ മേഘങ്ങൾ കാറ്റിൽ കിഴക്കോട്ടു മാറിയാണു പെയ്യുന്നതെന്നും കുസാറ്റിലെ കാലാവസ്ഥാ വിഭാഗം ഗവേഷകൻ ഡോ. എം.ജെ. മനോജ് പറഞ്ഞു.
മാർച്ച് ഒന്നു മുതലുള്ള കാലയളവിൽ ജില്ലയിൽ ഇതുവരെ 43% മഴ കുറവാണു രേഖപ്പെടുത്തിയത്. 262.2 മില്ലീമീറ്റർ മഴ പെയ്യേണ്ട സ്ഥാനത്ത് 149.8 മില്ലീമീറ്റർ മഴ മാത്രമേ പെയ്തുള്ളുവെന്നാണു കേന്ദ്രകാലാവസ്ഥാ വിഭാഗത്തിന്റെ കണക്ക്. വരും ദിവസങ്ങളിൽ വേനൽമഴ ശക്തിപ്പെടുന്നതോടെ മഴക്കുറവ് പരിഹരിക്കപ്പെടാനാണു സാധ്യതയെന്നും ഡോ. മനോജ് പറഞ്ഞു.
ചൂട് കുറഞ്ഞു
ഏതാനും ദിവസങ്ങളിൽ വേനൽമഴ ലഭിച്ചതും ഉച്ച സമയത്ത് അന്തരീക്ഷം മേഘാവൃതമാകുന്നതും കാരണം ജില്ലയിലെ ചൂട് കുറഞ്ഞു. ഒരാഴ്ച മുൻപു വരെ 37 ഡിഗ്രി സെൽഷ്യസിൽ അധികമാണ് ഉയർന്ന താപനില രേഖപ്പെടുത്തിയിരുന്നത് എങ്കിൽ ഇപ്പോൾ 35 ഡിഗ്രി സെൽഷ്യസാണു മിക്ക ദിവസങ്ങളിലെയും താപനില. ഇന്നലെ 34.2 ഡിഗ്രി സെൽഷ്യസാണ് ഉയർന്ന താപനില രേഖപ്പെടുത്തിയത്. 26.2 ഡിഗ്രി സെൽഷ്യസാണു കുറഞ്ഞ താപനില.