കൊച്ചിയിൽ 4000 കോടിയുടെ മൂന്നു വൻകിട പദ്ധതികളുടെ ഉദ്ഘാടനം ഇന്ന്; ആവേശം നിറയ്ക്കാൻ മോദി വീണ്ടും
Mail This Article
കൊച്ചി∙ നാലായിരം കോടി രൂപയുടെ മൂന്നു വൻകിട പദ്ധതികളുടെ ഉദ്ഘാടനമാണ് പ്രധാനമന്ത്രി നരേന്ദ്ര മോദി ഇന്ന് നടത്തുന്നത്. കൊച്ചി ഷിപ്യാഡിലെ ഡ്രൈ ഡോക്, രാജ്യാന്തര കപ്പൽ അറ്റകുറ്റപ്പണി കേന്ദ്രം, ഐഒസിയുടെ എൽപിജി ഇറക്കുമതി ടെർമിനൽ എന്നിവയുടെ ഉദ്ഘാടനം അദ്ദേഹം നിർവഹിക്കും. തുറമുഖ, ഷിപ്പിങ്, വാതക മേഖലയിൽ രാജ്യത്തിന്റെ ശേഷി വർധിപ്പിക്കുകയെന്ന കേന്ദ്ര നയത്തിന്റെ ചുവടു പിടിച്ചാണു പദ്ധതികൾ. മാരിടൈം – ഷിപ്പിങ് മേഖലയിൽ ആഗോള ഹബ്ബായി ഉയരാൻ ഇവ കൊച്ചിക്കു വഴിയൊരുക്കും.
∙ കൂറ്റൻ കപ്പലുകളും നിർമിക്കാം, കൊച്ചിയിൽ
ഷിപ്യാഡിലെ 15 ഏക്കറിൽ 1800 കോടി രൂപ െചലവിൽ നിർമിച്ച ഡ്രൈ ഡോക്ക് കപ്പൽ നിർമാണ രംഗത്തു ഷിപ്യാഡിന്റെ വളർച്ചയ്ക്ക് ആക്കം കൂട്ടും. 310 മീറ്റർ നീളവും 75 മീറ്റർ വീതിയും 13 മീറ്റർ ആഴവുമുള്ള ഡ്രൈ ഡോക്ക് ഇന്ത്യയിലെ തന്നെ വമ്പൻ. 70,000 ടൺ കേവു ഭാരമുള്ള കൂറ്റൻ വിമാനവാഹിനി കപ്പലുകൾ, എൽഎൻജി കാരിയറുകൾ, ഡ്രജറുകൾ, വാണിജ്യ യാനങ്ങൾ തുടങ്ങിയവയെല്ലാം നിർമിക്കാനാകും.