പാറ്റക്കൽ-ബ്ലാത്തൂർ റോഡിൽ പുലിയെ കണ്ടതായി ബൈക്ക് യാത്രക്കാർ

ഇരിക്കൂർ ∙ പാറ്റക്കൽ-കക്കട്ടംപാറ-ബ്ലാത്തൂർ റോഡിൽ ബൈക്ക് യാത്രക്കാർ പുലിയെ കണ്ടതായി അറിയിച്ചതിനെ തുടർന്ന് വനം വകുപ്പ് സംഘം പരിശോധന നടത്തി. വെള്ളിയാഴ്ച രാത്രി 12ന് കലിക്കോട് വെള്ളച്ചാട്ടത്തിന് സമീപം റോഡരികിലെ ചതുപ്പിൽ നിൽക്കുന്നതായി കണ്ടെന്നാണ് പറയുന്നത്. ശ്രീകണ്ഠപുരം സെക്‌ഷൻ ഫോറസ്റ്റ് ഓഫിസർ എ.കെ.ബാലന്റെ നേതൃത്വത്തിൽ വനം വകുപ്പ് സംഘവും നാട്ടുകാരും രാത്രിയും ഇന്നലെ ഉച്ചവരെയും പ്രദേശത്ത് തിരച്ചിൽ നടത്തിയെങ്കിലും കണ്ടെത്താൻ കഴിഞ്ഞില്ല.

2 കാൽപാടുകൾ ലഭിച്ചെങ്കിലും ചെളി പടർന്നതിനാൽ പുലിയാണോ കാട്ടുപൂച്ചയാണോ എന്ന് സ്ഥിരീകരിക്കാൻ കഴിഞ്ഞിട്ടില്ലെന്ന് വനം വകുപ്പ് അധികൃതർ പറഞ്ഞു. പുലിയെന്ന് സംശയിക്കാൻ കഴിയുന്ന മറ്റു തെളിവുകളൊന്നും ലഭിച്ചിട്ടില്ല.ഇവിടം 2 കിലോമീറ്ററിലേറെ ദൂരം കാട് മൂടിയ വിജനമായ പ്രദേശമാണ്. ബീറ്റ് ഫോറസ്റ്റ് ഓഫിസർമാരായ വൈശാഖ് രാജൻ, സുജിത്ത് രാഘവൻ, ബിബിൻ, വാച്ചർമാരായ അഖിൽ ബിനോയ്, രജീഷ്, ഡ്രൈവർ സി.കെ.അജീഷ് എന്നിവർ തിരച്ചിലിൽ പങ്കെടുത്തു.