മയ്യിൽ ഗവ. പ്രീമെട്രിക് ഹോസ്റ്റലിനോട് അധികൃതരുടെ അവഗണന; പ്രതിഷേധം
Mail This Article
മയ്യിൽ∙ ചെക്യാട്ട് ഗുഹാ റോഡിലെ മയ്യിൽ ഗവ. പ്രീമെട്രിക് ഹോസ്റ്റലിനോടു (ഗേൾസ്) അധികൃതർ കാണിക്കുന്ന അവഗണനയ്ക്കെതിരെ പ്രതിഷേധമുയരുന്നു. ഹോസ്റ്റലിന്റെ ചുറ്റുമതിൽ തകർന്ന് വീണ് മൂന്ന് വർഷത്തിലേറെ കഴിഞ്ഞിട്ടും പുനർ നിർമിച്ചിട്ടില്ല. ഹോസ്റ്റലിൽ സ്ഥാപിച്ച സിസിടിവി വർഷങ്ങളായി പ്രവർത്തനരഹിതമാണ്. വൈദ്യുതി നിലച്ചാൽ പകരം സംവിധാനങ്ങളുമില്ല. ഈ പ്രശ്നങ്ങൾ ഒട്ടേറെത്തവണ രക്ഷിതാക്കൾ പിടിഎ മീറ്റിങ്ങിൽ അടക്കം ആവശ്യപ്പെട്ടിട്ടും പരിഹാരമുണ്ടായിട്ടില്ല.
തകർന്നുവീണ മതിലിന്റെ ഭാഗങ്ങൾ കാടുകയറി പാമ്പുകൾ അടക്കമുള്ള ഇഴജന്തുക്കളുടെ ആവാസകേന്ദ്രമാണ്. തകർന്ന ഭാഗങ്ങളിലൂടെ തെരുവുനായ്കൾ വരുന്നത് മൂലമുള്ള ദുരിതവും ഏറിവരികയാണ്. വൈദ്യുതി നിലയ്ക്കുന്നതു അടുക്കളയുടെ പ്രവർത്തനത്തെയും സാരമായി ബാധിക്കുകയാണ്. 41 വിദ്യാർഥികളാണ് ഇവിടെ താമസിച്ച് പഠിക്കുന്നത്. 15 വർഷം മുൻപാണ് ഹോസ്റ്റൽ ഉദ്ഘാടനം നടന്നത്. സമീപമുള്ള ബോയ്സ് ഹോസ്റ്റലിന്റെ മുൻവശം മതിലും വാഹനം ഇടിച്ച് തകർന്ന നിലയിലാണ്.