പ്രഭാഷണം കേൾക്കാം, സംവദിക്കാം; തുഷാർ ഗാന്ധി നാളെ കോട്ടയത്ത്

കോട്ടയം∙ ‘ടോക്സ് ഇന്ത്യ’യുടെ പ്രതിമാസ പ്രഭാഷണ പരിപാടിയുടെ ഉദ്ഘാടനത്തിന് മഹാത്മാഗാന്ധിയുടെ പ്രപൗത്രനും എഴുത്തുകാരനുമായ തുഷാർ ഗാന്ധി നാളെ കോട്ടയത്ത് എത്തും.  4.30ന് കെപിഎസ് മേനോൻ ഹാളിലാണ് പരിപാടി. പ്രഭാഷകനുമായി ജനങ്ങൾക്കു സംവദിക്കാൻ അവസരമുണ്ട്. പബ്ലിക് ലൈബ്രറി പ്രസിഡന്റ് ഏബ്രഹാം ഇട്ടിച്ചെറിയ അധ്യക്ഷത വഹിക്കും. ഫാ.എം.പി ജോർജ് ടോക്സ് ഇന്ത്യ ഗാനം ആലപിക്കും.  കോട്ടയം പബ്ലിക് ലൈബ്രറിയും തിരുവല്ല മുളമൂട്ടിലച്ചൻ ഫൗണ്ടേഷനും ചേർന്ന് സംഘടിപ്പിക്കുന്ന പരിപാടിയിൽ ഓരോ മാസവും ഇന്ത്യയിലും വിദേശത്തുംനിന്നുള്ള പ്രമുഖരുടെ പ്രഭാഷണങ്ങൾ നടത്താനാണ് ലക്ഷ്യമിടുന്നത്.

റെഡിഫ്.കോം ചെയർമാനും സിഇഒയുമായ അജിത് ബാലകൃഷ്ണൻ, ഗൂഗിൾ ക്ലൗഡ് സിഇഒ തോമസ് കുര്യൻ, എഴുത്തുകാരി അരുന്ധതി റോയ്, ശശി തരൂർ എംപി തുടങ്ങിയവർ വരുംമാസങ്ങളിൽ പ്രഭാഷണത്തിന് എത്തും. വിവരസാങ്കേതിക വിപ്ലവത്തിന്റെ ഇക്കാലത്ത് വിജ്ഞാന സമൂഹനിർമിതി ലക്ഷ്യമിട്ടാണ് ടോക്സ് ഇന്ത്യ ആരംഭിച്ചത്.  ശാസ്ത്ര-സാങ്കേതിക പ്രദർശനങ്ങൾ, സ്റ്റാർട്ടപ്പുകൾ എന്നിവയും ഇതിന്റെ ഭാഗമായി നടത്താൻ പദ്ധതിയുണ്ട്.