വസായ് ടു പൻവേൽ: വേണം, കൂടുതൽ ലോക്കലുകൾ
![mumbai-local-train-services mumbai-local-train-services](https://img-mm.manoramaonline.com/content/dam/mm/mo/district-news/mumbai/images/2024/7/24/mumbai-local-train-services.jpg?w=1120&h=583)
Mail This Article
മുംബൈ ∙ വസായ്- പൻവേൽ റൂട്ടിൽ ലോക്കൽ ട്രെയിൻ സർവീസുകളുടെ എണ്ണം കൂട്ടണമെന്ന് ആവശ്യം ശക്തം. സർവീസ് കൂട്ടിയാൽ ഭിവണ്ടി, ഡോംബിവ്ലി, തലോജ എന്നീ വ്യവസായ മേഖലകളിലേക്കും, ബോറിവ്ലി, ഡഹാണു മേഖലയിലേക്കുമുള്ള യാത്രാസൗകര്യം മെച്ചപ്പെടും. താനെ, പാൽഘർ ജില്ലകളിലെ ദീർഘദൂര യാത്രക്കാർക്കും ഗുണം ലഭിക്കും. വസായ്– പൻവേൽ ലോക്കൽ ട്രെയിൻ സർവീസുകളുടെ എണ്ണം വർധിപ്പിക്കുന്നത് വെസ്റ്റേൺ ലൈനിലെയും മെയിൻ ലൈനിലെയും യാത്രക്കാരുടെ തിരക്ക് കുറയ്ക്കാനും സഹായിക്കും.
പശ്ചിമ മേഖലയിൽ താമസിക്കുന്നവർക്ക് ഡോംബിവ്ലി, ദിവ, കല്യാൺ മേഖലകളിൽ എളുപ്പത്തിൽ എത്തിച്ചേരാനും വഴിയൊരുങ്ങും. വസായ്- വിരാർ മേഖലകളിൽ നിന്നു ഡോംബിവ്ലി, കല്യാൺ എന്നിവിടങ്ങളിലേക്ക് ദാദർ വഴി എത്തിച്ചേരാൻ നിലവിൽ രണ്ടര മണിക്കൂറോളം വേണ്ടിവരുന്നുണ്ട്. വസായ്- പൻവേൽ ട്രെയിനിലാണെങ്കിൽ ഒരു മണിക്കൂർകൊണ്ട് എത്തിച്ചേരാൻ സാധിക്കുമെന്നതാണു നേട്ടം.
പശ്ചിമ റെയിൽവേയും മധ്യറെയിൽവേയും എല്ലാ വർഷവും ലോക്കൽ സർവീസുകളുടെ എണ്ണം വർധിപ്പിക്കുന്നുണ്ട്. എന്നാൽ, കഴിഞ്ഞ 10 വർഷത്തിനിടെ യാത്രക്കാരുടെ എണ്ണം കൂടിയിട്ടും വസായ്-പ ൻവേൽ റൂട്ടിൽ ലോക്കൽ സർവീസുകളുടെ എണ്ണം കൂട്ടാത്തത് എന്തുകൊണ്ടാണെന്ന് മനസ്സിലാകുന്നില്ലെന്നു പതിവു യാത്രക്കാർ പറഞ്ഞു.