ക്ലിനിക്കൽ സൈക്കോളജി ബിരുദാനന്തര ബിരുദത്തിൽ ഒന്നാം റാങ്ക്; അഭിമാനമായി സഹർ

ഡൽഹി∙ പഞ്ചാബിലെ ലവ്‌ലി പ്രൊഫഷണൽ യൂണിവേഴ്സിറ്റിയിൽ നിന്നും ക്ലിനിക്കൽ സൈക്കോളജിയിൽ ബിരുദാനന്തര ബിരുദത്തിൽ ഒന്നാം റാങ്കും ഏറ്റവും ഉയർന്ന മാർക്കിനുള്ള ഗോൾഡ് മെഡലും സ്വന്തമാക്കി സഹർ അബ്ദുൾ ഗഫൂർ. തൃശൂർ കൊടുങ്ങല്ലൂർ (എരിശ്ശേരി പാലം - ഡു വെറി) അബ്ദുൾ ഗഫൂറിന്റേയും മാള വലിയകത്ത് സുനിത ഹമീദിന്റേയും മകളാണ്. സർവകലാശാലയുടെ ചരിത്രത്തിൽ ആദ്യമായാണ് ക്ലിനിക്കൽ സൈക്കോളജിയിൽ ഏറ്റവും ഉയർന്ന മാർക്ക് (95.2%) ലഭിച്ച് ഗോൾഡ് മെഡൽ കരസ്ഥമാക്കി സഹർ കേരളത്തിന് അഭിമാനം ആകുന്നത്.

ഖത്തർ ഐഡിയൽ സ്കൂളിൽ വിദ്യാഭ്യാസം പൂർത്തിയാക്കിയ സഹർ, സിബിഎസ്ഇ സീനിയർ സെക്കൻഡറി പരീക്ഷയിൽ സൈക്കോളജിയിൽ 100% ശതമാനം മാർക്കോടെ ഓൾ ഇന്ത്യ & ഗൾഫ് മേഖലകളിൽ ഒന്നാം സ്ഥാനം നേടിയിരുന്നു. കൗൺസിൽ ഓഫ് സിബിഎസ്ഇ അഫിലിയേറ്റഡ് ഓൾ ഗൾഫ് സ്കൂൾ അവാർഡും കരസ്ഥമാക്കിയിട്ടുണ്ട്. തിരുവനന്തപുരം മഹാരാജാസ് വിമൻസ് കോളജിൽ നിന്ന് സൈക്കോളജിയിൽ ഡിസ്റ്റിങ്ഷനോടെയാണ് ബിരുദവും പൂർത്തിയാക്കിയത്.