കാർ മറിഞ്ഞ് അച്ഛനും 2 മക്കൾക്കും പരുക്ക്
Mail This Article
കാരാകുറുശ്ശി ∙ മണ്ണാർക്കാട്–കോങ്ങാട് റോഡിൽ കോളപ്പാക്കം പാലത്തിനു സമീപം കാർ 20 അടി താഴ്ചയിലേക്ക് മറിഞ്ഞ് അച്ഛനും രണ്ടു മക്കൾക്കും പരുക്കേറ്റു. വെള്ളിയാഴ്ച പുലർച്ചെ 12 മണിയോടെയാണ് അപകടം. കാരാകുറുശ്ശി ഏറ്റുപുറത്ത് വീട്ടിൽ ബാബു (40), മക്കൾ അഖിൽ കൃഷ്ണ (14), അഭിജ്ഞന(12) എന്നിവർക്കാണു പരുക്കേറ്റത്. ഇവരെ വട്ടമ്പലം സ്വകാര്യ ആശുപത്രിയിൽ പ്രവേശിപ്പിച്ചു.
മണ്ണാർക്കാട് നിന്നു കാരാകുറുശ്ശി ഭാഗത്തേക്കു പോകുന്നതിനിടെയാണ് അപകടം. നിയന്ത്രണം തെറ്റി റോഡിനു താഴേക്കു മറിയുകയായിരുന്നു. കാർ വീഴുന്ന ശബ്ദം കേട്ടു ഓടിക്കൂടിയ നാട്ടുകാർ തലകീഴായി കിടന്നിരുന്ന കാറിൽ നിന്നു അച്ഛനെയും മക്കളെയും പുറത്തെടുക്കാൻ ശ്രമം നടത്തി. വിവരം അറിഞ്ഞു ആംബുലൻസും സ്ഥലത്തെത്തി. നാട്ടുകാരും ആംബുലൻസ് പ്രവർത്തകരും പരുക്കേറ്റവരെ കാറിൽ നിന്നു പുറത്തെടുത്തു.
ഇതിനിടെ മണ്ണാർക്കാട് അഗ്നിരക്ഷാ സേന സീനിയർ ഫയർ ആൻഡ് റെസ്ക്യൂ ഓഫിസർ ടി.ജയരാജന്റെ നേതൃത്വത്തിൽ വി.സുരേഷ് കുമാർ, കെ.വി.സുജിത്ത്, എം.രമേഷ്, എം.ആർ.രാഗിൽ,ടി.കെ.അൻസൽ ബാബു എന്നിവരടങ്ങിയ സംഘം സ്ഥലത്തെത്തിയിരുന്നു. പരുക്കേറ്റവരെ മണ്ണാർക്കാട് വട്ടമ്പലം സ്വകാര്യ ആശുപത്രിയിൽ പ്രവേശിപ്പിച്ചു.
