മോഷ്ടിച്ച ബൈക്കുമായി കഞ്ചാവു കടത്ത്: രണ്ടു പേർ അറസ്റ്റിൽ

ഷൊർണൂർ ∙ റെയിൽവേ സ്റ്റേഷൻ പരിസരത്തു നിന്നു മോഷ്ടിച്ച ബൈക്കിൽ കഞ്ചാവു കടത്തിയ രണ്ടു പേർ പിടിയിൽ. പത്തനംതിട്ട കോന്നി പന്നിക്കമണ്ണിൽ അഭിജിത്ത് (28), മണ്ണാർക്കാട് നെല്ലിപ്പുഴ കളത്തിൽ വീട്ടിൽ നൗഷിദ (19) എന്നിവരെയാണു ഷൊർണൂർ പൊലീസ് അറസ്റ്റ് ചെയ്തത്. മൂന്നാഴ്ച മുൻപു മോഷ്ടിക്കപ്പെട്ട ബൈക്ക് വീണ്ടെടുത്തു.  

ഓഗസ്റ്റ് 27നു വൈകിട്ടാണു റെയിൽവേ സ്റ്റേഷൻ പരിസരത്തു നിന്നു തത്തമംഗലം ചെമ്പകശേരി സ്വദേശി വിജുവിന്റെ ബൈക്ക് മോഷണം പോയത്. നിരീക്ഷണ ക്യാമറകളിലെ ദൃശ്യങ്ങൾ പിന്തുടർന്ന ഷൊർണൂർ പൊലീസ് കഴിഞ്ഞ ദിവസം വൈകിട്ടു റെയിൽവേ സ്റ്റേഷൻ മേൽപാലത്തിനു താഴെ നിന്നാണു 2 കിലോ കഞ്ചാവുമായി പ്രതികളെ പിടികൂടിയത്. എറണാകുളം ജില്ലയിലെ വിവിധ സ്റ്റേഷനുകളിൽ ഇവർക്കെതിരെ മോഷണക്കേസുകൾ ഉണ്ടെന്നു പൊലീസ് അറിയിച്ചു. പ്രതികളെ കോടതി റിമാൻഡ് ചെയ്തു. പട്ടാമ്പിയിൽ മണ്ണുമാന്തി യന്ത്രത്തിന്റെ ഓപ്പറേറ്റർ ജോലിക്കായാണ് അഭിജിത്ത് എത്തിയത്.