വേനൽ ചൂട് കടുക്കുന്നു; കൃഷി കരിഞ്ഞുണങ്ങുന്നു
Mail This Article
പനമരം ∙ വേനൽ ചൂടിൽ ജില്ലയിൽ പലയിടത്തും കൃഷികൾ ഉണങ്ങി നശിക്കുന്നു. കടുത്ത ചൂടിൽ പുഴ, തോട്, കിണർ ഉൾപ്പെടെ വറ്റി വരണ്ടുതുടങ്ങിയതിനു പുറമേയാണു കൃഷികൾ ഉണങ്ങി നശിക്കുന്നത്. പനമരം, പൂതാടി, പുൽപള്ളി, മുള്ളൻകൊല്ലി പഞ്ചായത്തുകളിലെ ഭൂരിഭാഗം കർഷകരുടെയും കാർഷിക വിളകൾ കരിഞ്ഞു തുടങ്ങി. കാപ്പി, കുരുമുളക്, വാഴ അടക്കമുളള കൃഷികളാണ് ഉണക്കു ബാധിച്ചു കരിഞ്ഞു നശിക്കുന്നത്. സാധാരണ വേനലിനെ പ്രതിരോധിക്കുന്ന പൂവൻ വാഴകൾക്കും ഇത്തവണത്തെ കൊടുംചൂടിൽ പിടിച്ചു നിൽക്കാനാകുന്നില്ല. കമുകു കർഷകരും പ്രതിസന്ധിയിലാണ്.
വയലുകളിലെ കുളങ്ങൾ വറ്റിയതും പുല്ല് കരിഞ്ഞുണങ്ങിയതും പോത്ത് വളർത്തുന്നവരെയും ദുരിതത്തിലാക്കിയിരിക്കുകയാണ്. പുഴയിൽ വെള്ളം കെട്ടി നിൽക്കുന്ന ഭാഗത്തെ കർഷകർക്കു മാത്രമാണ് അൽപം ആശ്വാസമാകുന്നത്. മഴ നേരത്തെ എത്തിയില്ലെങ്കിൽ ജില്ലയിലെ കർഷക ജീവിതങ്ങളും കരിഞ്ഞുണങ്ങും. കൃഷി നശിച്ചവർക്കു സർക്കാർ സഹായം എത്രയും പെട്ടെന്നു ലഭ്യമാക്കിയില്ലെങ്കിൽ സ്ഥിതി കൂടുതൽ രൂക്ഷമാകും. ഇതിനിടെ ഇന്നലെ വൈകിട്ട് ചുരുക്കം ചില സ്ഥലങ്ങളിൽ ചെറിയതോതിൽ മഴ ചാറി.