ബീച്ച്ക്രാഫ്റ്റ് വി 35 വിമാനം തകർന്ന് മൂന്ന് മരണം

ടെനിസി∙ ബുധനാഴ്ച ടെനിസിയിലെ ഫ്രാങ്ക്ലിനിനടുത്ത് ബീച്ച്ക്രാഫ്റ്റ് വി 35 വിമാനം തകർന്ന് മൂന്ന് പേർ മരിച്ചു. വിമാനം  ആകാശത്ത് വച്ച് പൊട്ടിത്തെറിച്ചതായി രാജ്യാന്തര മാധ്യമങ്ങൾ റിപ്പോർട്ട് ചെയ്തു. ബാറ്റൺ റൂജിന് തെക്കുപടിഞ്ഞാറുള്ള ലൂസിയാന റീജനൽ എയർപോർട്ടിൽ നിന്ന് വി35 പുറപ്പെട്ട് കെന്‍റക്കിയിലെ ലൂയിസ്‌വില്ലെയിലേക്ക് പോകുന്നതിനിടെയാണ് സംഭവമുണ്ടായത്. 

ബാറ്റൺ റൂജ് ആസ്ഥാനമായുള്ള പ്ലാസ്റ്റിക് സർജനായ ഡോ. ലൂസിയസ് ഡൗസെറ്റിന്‍റെ പേരിലാണ് വിമാനം റജിസ്റ്റർ ചെയ്തത്. അപകടത്തിൽ ഇദ്ദേഹം കൊല്ലപ്പെട്ടു. കൊല്ലപ്പെട്ട മറ്റ് രണ്ട് പേരുടെ ഐഡന്‍റിറ്റി ഇതുവരെ സ്ഥിരീകരിച്ചിട്ടില്ല. നാഷനൽ ട്രാൻസ്‌പോർട്ടേഷൻ സേഫ്റ്റി ബോർഡ് അപകടത്തെക്കുറിച്ച് അന്വേഷണം ആരംഭിച്ചിട്ടുണ്ട്.