പിക്കപ്പ് ട്രക്കിൽ മൂന്നു വയസ്സുകാരി ചൂടേറ്റു മരിച്ചു

ഹൂസ്റ്റൺ ∙ വടക്കുപടിഞ്ഞാറൻ ഹൂസ്റ്റണിൽ പിക്കപ്പ് ട്രക്കിൽ  3 വയസ്സുകാരി മരിച്ചതായി ഹൂസ്റ്റൺ പൊലീസ് അറിയിച്ചു. കുട്ടിക്ക് 4 വയസ്സായിരുന്നു എന്നാണ് ഉദ്യോഗസ്ഥർ ആദ്യം പറഞ്ഞത്. എന്നാൽ  കുട്ടിക്ക്  3 വയസ്സാണെന്നു ഹൂസ്റ്റൺ പൊലീസ് വെള്ളിയാഴ്ച റിപ്പോർട്ട് ചെയ്തു.

നോർത്ത് വെസ്റ്റ് ഫ്രീവേയിൽ നിന്ന് ഹോളിസ്റ്റർ റോഡിലുള്ള ഒരു അപ്പാർട്ട്‌മെന്റ് സമുച്ചയത്തിലാണ് സംഭവം. നിരവധി കുട്ടികളുമായി രണ്ട് സ്ത്രീകളാണ് കാറിലുണ്ടായിരുന്നത്. അവർ ട്രക്കിൽ നിന്നിറങ്ങി  അപ്പാർട്ട്മെന്റിനുള്ളിലേക്ക് പോയി. 3 വയസ്സുകാരിയെ ട്രക്കിൽ മറന്നു. ട്രക്കിൽ ആകെ എത്ര കുട്ടികളുണ്ടായിരുന്നു എന്ന് അറിവായിട്ടില്ല. 

കുട്ടിയെ കാണാനില്ലെന്ന് മനസ്സിലാക്കിയ സ്ത്രീകൾ തിരികെ വന്ന് കുട്ടിയെ കണ്ടെത്തി. ഹൂസ്റ്റൺ പൊലീസിനെയും അഗ്നിശമനസേനയെയും വിളിച്ചു. തുടർന്ന് പ്രദേശത്തെ ആശുപത്രിയിൽ എത്തിച്ചെങ്കിലും പിന്നീട് മരിച്ചു.