കള്ളക്കോളിൽ വീഴരുത്; മുന്നറിയിപ്പ് നൽകി ടെലികോം മന്ത്രാലയം

ന്യൂഡൽഹി ∙ മൊബൈൽ ഫോൺ കണക‍്ഷൻ 2 മണിക്കൂറിനുള്ളിൽ വിഛേദിക്കുമെന്നു പറഞ്ഞുള്ള തട്ടിപ്പു ഫോൺകോളുകൾ വ്യാപകമാണെന്നും ഇതിൽ വീഴരുതെന്നും കേന്ദ്ര ടെലികോം മന്ത്രാലയം മുന്നറിയിപ്പ് നൽകി. മൊബൈൽ നമ്പറുകൾ വിഛേദിക്കുമെന്നോ ചില നിയമവിരുദ്ധ പ്രവർത്തനങ്ങളിൽ നിങ്ങളുടെ മൊബൈൽ നമ്പർ ദുരുപയോഗം ചെയ്യപ്പെടുന്നുണ്ട് എന്നു പറഞ്ഞോ ആണ് തട്ടിപ്പുകാർ വിളിക്കുന്നത്. ഇതിൽ ഭയചകിതരായി തട്ടിപ്പുകാർ പറയുന്നപ്രകാരം ചെയ്യരുത്.

ഇത്തരം സംഭവങ്ങൾ www.sancharsaathi.gov.in എന്ന വെബ്സൈറ്റിൽ റിപ്പോർട്ട് ചെയ്യണം. വിദേശത്തുനിന്നുള്ള വാട്സാപ് കോളുകളിൽ സർക്കാർ, പൊലീസ്, അന്വേഷണ ഏജൻസി ഉദ്യോഗസ്ഥരായി ആൾമാറാട്ടം നടത്തിയുള്ള കോളുകളെക്കുറിച്ചും കേന്ദ്രം മുന്നറിയിപ്പു നൽകി.