ഉപ്പുതൊട്ട് നൂലുകൾ വരെ, ലഹരി കടത്താൻ പുതുവഴികൾ; റവന്യൂ ഇന്റലിജൻസ് റിപ്പോർട്ട്

ന്യൂഡൽഹി ∙ ഹെറോയിൻ ലായനിയിൽ മുക്കിയ നൂലുകൾ ലഹരിക്കടത്തിലെ പുതിയ രീതിയാണെന്നു ഡയറക്ടറേറ്റ് ഓഫ് റവന്യൂ ഇന്റലിജൻസിന്റെ റിപ്പോർട്ട്. അഫ്ഗാനിസ്ഥാനിൽനിന്ന് ഇറാൻ, യുഎഇ വഴി റോക്ക് സാൾട്ട്, ടാൽകം പൗഡർ എന്നിവയിൽ കലർത്തി ഹെറോയിൻ കടത്തുന്നതായും റിപ്പോർട്ടിലുണ്ട്. ഡിആർഐയും കസ്റ്റംസും 2022–23 ൽ പിടികൂടിയ കള്ളക്കടത്തു കേസുകളെ അടിസ്ഥാനമാക്കിയാണു റിപ്പോർട്ട്.

∙കണ്ടെയ്നറുകളുടെ വശങ്ങളിലെ അറകളിൽ ഹെറോയിൻ അടക്കമുള്ള ലഹരിവസ്തുക്കൾ ഒളിപ്പിക്കുന്ന സംഭവങ്ങൾ വർധിക്കുന്നു.

∙കരിയും മറ്റു ചില വസ്തുക്കളുമായി ചേർത്ത്, കൊക്കെയ്ൻ നിറം മാറ്റി ‘ബ്ലാക്ക് കൊക്കെയ്ൻ’ ആക്കി കടത്തുന്നുണ്ട്. പിന്നീട് ചില ജൈവ ലായനികൾ ചേർത്ത് കൊക്കെയ്ൻ വേർതിരിച്ചെടുക്കും.

∙ദ്രാവക കൊക്കെയ്ൻ വിദേശ നിർമിത വിദേശമദ്യമെന്ന പേരിൽ പ്രശസ്ത ബ്രാൻഡുകളുടെ കുപ്പികളിൽ കടത്തുന്നു.

∙കണ്ടെയ്നറുകളിൽ വിദേശ സിഗരറ്റു കടത്ത് വ്യാപകം. കണ്ടെയ്നറുകൾ, പ്രത്യേക സാമ്പത്തിക മേഖലയിലേക്കോ ഇൻലാൻഡ് കണ്ടെയ്നർ ഡിപ്പോകളിലേക്കു തിരിച്ചുവിടുകയും അവിടെയെത്തും മുൻപ് സിഗരറ്റ് പായ്ക്കറ്റുകൾ മാറ്റുകയും ചെയ്യുന്നു.

∙സിഗരറ്റ് കടത്തു പിടിച്ചാൽ, കൊണ്ടുവന്ന രാജ്യത്തേക്കു തിരികെ കയറ്റുമതി ചെയ്യുന്നതായി വ്യാജരേഖയുണ്ടാക്കുകയും സിഗരറ്റുകൾ ഇവിടെത്തന്നെ വിൽക്കുകയും ചെയ്ത സംഭവങ്ങളുണ്ട്.

∙ഗ്ലാസ് ടംബ്ലറിന് കേടുപറ്റാതിരിക്കാൻ വച്ച തെർമോക്കോളിനകത്തു കൊക്കെയ്ൻ കടത്തിയിട്ടുണ്ട്.

∙വിമാനത്താവളം, പാഴ്സലുകൾ, കണ്ടെയ്നർ എന്നിവ വഴിയുള്ള ലഹരിക്കടത്ത് വർധിക്കുന്നു.

∙ഇന്ത്യയിലേക്കു കൊക്കെയ്ൻ, മെതാംഫിറ്റമിൻ എന്നിവയുടെ കടത്ത് വർധിക്കുന്നു.

∙2022–23 ൽ ഡിആർഐ മാത്രം 131 കേസുകളിലായി 27, 617 കിലോഗ്രാം ലഹരിമരുന്നുകൾ പിടിച്ചെടുത്തിട്ടുണ്ട്. 24,888 കിലോഗ്രാം കഞ്ചാവ്, 1410 കിലോഗ്രാം ഹെറോയിൻ, 98.20 കിലോഗ്രാം കൊക്കെയ്ൻ തുടങ്ങിയവ പിടിച്ചെടുത്തു.

∙ഇതേ കാലയളവിൽ കസ്റ്റംസ് പിടിച്ചെടുത്തത് 1.07 ലക്ഷം കിലോഗ്രാം ലഹരിമരുന്നുകൾ. ഇതിന്റെ മൂല്യം 17,255 കോടി രൂപ വരും.