ഫഡ്നാവിസ് ആർഎസ്എസ് ആസ്ഥാനത്ത്, സന്ദർശനം ബിജെപി ദേശീയ അധ്യക്ഷനാകുമെന്ന അഭ്യൂഹങ്ങൾക്കിടെ

മുംബൈ ∙ ബിജെപി ദേശീയ അധ്യക്ഷ സ്ഥാനത്തേക്ക് മഹാരാഷ്ട്ര ഉപമുഖ്യമന്ത്രി ദേവേന്ദ്ര ഫഡ്നാവിസിനെ പരിഗണിക്കുമെന്ന അഭ്യൂഹം നിലനിൽക്കെ അദ്ദേഹം ആർഎസ്എസ് ആസ്ഥാനം സന്ദർശിച്ചു. നിയമസഭാ തിരഞ്ഞെടുപ്പിന് മുന്നോടിയായി ആർ‍എസ്എസുമായുള്ള ബന്ധം മെച്ചപ്പെടുത്തുന്നതിന്റെ ഭാഗമായാണ് കൂടിക്കാഴ്ച. കുറച്ചുകാലമായി ആർഎസ്എസും ബിജെപിയും ഭിന്നതയിലാണെന്നു വാർത്തകളുണ്ടായിരുന്നു.

എൻസിപി നേതാവ് അജിത് പവാറിനെ ബിജെപി സഖ്യത്തിന്റെ ഭാഗമാക്കി, ഉപമുഖ്യമന്ത്രിയാക്കിയതിൽ ആർഎസ്എസ് കടുത്ത വിമർശനം ഉന്നയിച്ചിരുന്നു. കഴിഞ്ഞ ലോക്സഭാ തിരഞ്ഞെടുപ്പിൽ മത്സരിച്ച 28 സീറ്റുകളിൽ 9 സീറ്റുകളിൽ  മാത്രമാണ് ബിജെപിക്ക് വിജയിക്കാനായത്.