കാറിന്റെ സണ്‍റൂഫില്‍ 3 കുട്ടികളെ ഇരുത്തി ഡ്രൈവിങ്; ലൈസന്‍സ് സസ്പെന്‍ഡ് ചെയ്തു
Mail This Article
കോഴിക്കോട്∙ മൂന്നു കുട്ടികളെ കാറിന്റെ സണ്‍റൂഫില്‍ ഇരുത്തി അപകടകരമായി കാറോ‌ടിച്ച സംഭവത്തില്‍ ഉടമയുടെ ലൈസന്‍സ് മോട്ടര്‍ വാഹന വകുപ്പ് (എംവിഡി) സസ്പെന്‍ഡ് ചെയ്തു. വാഹനമോടിക്കുന്നതിന്റെ ദൃശ്യങ്ങള്‍ സമൂഹമാധ്യമങ്ങളില്‍ വൈറലായതിനു പിന്നാലെയാണ് നടപടി.
കോഴിക്കോട് കുന്നമംഗലത്ത് കഴിഞ്ഞ ബുധനാഴ്ച രാത്രിയായിരുന്നു സംഭവം. മൂന്നു കുട്ടികളെ കാറിന്റെ സണ്‍റൂഫില്‍ ഇരുത്തിയാണ് കാറുടമയായ നരിക്കുനി പന്നിക്കോട് സ്വദേശി മുജീബ് അമിതവേഗത്തില്‍ വാഹനമോടിച്ചത്. പിന്നാലെ വന്ന വാഹനത്തിലെ യാത്രക്കാര്‍ കാറിന്റെ ദൃശ്യങ്ങള്‍ ഫോണില്‍ പകര്‍ത്തി സമൂഹമാധ്യമങ്ങളില്‍ പങ്കുവച്ചു. ദൃശ്യങ്ങള്‍ പ്രചരിച്ചതോടെയാണ് എംവിഡി വിവരം അറിയുന്നത്.
തുടര്‍ന്ന് നടത്തിയ പരിശോധനയില്‍ കൊടുവള്ളി ജോയിന്റ് ആര്‍ടിഒ ഓഫിസില്‍ റജിസ്റ്റര്‍ ചെയ്ത വാഹനമാണെന്ന് കണ്ടെത്തി. തുടര്‍ന്ന് മുജീബിനെ ആര്‍ടിഒ ഓഫിസില്‍ വിളിച്ചുവരുത്തി കാരണം കാണിക്കല്‍ നോട്ടിസ് നല്‍കി. കാറോടിച്ചത് താനാണെന്ന് മുജീബ് സമ്മതിച്ചു. മുജീബിൽനിന്ന് വിശദീകരണം തേടിയശേഷമാണ് ലൈസന്‍സ് സസ്പെന്‍ഡ് ചെയ്യാന്‍ തീരുമാനിച്ചത്. ആറുമാസത്തേക്കാണ് സസ്പെന്‍ഷന്‍.
English Summary: Children sitting on Sunroof of running Car, Owner's Licence suspended
