ഉത്തർപ്രദേശിലെ മീററ്റിൽ കെട്ടിടം തകർന്ന് 9 മരണം; മരിച്ചവരിൽ ഒന്നര വയസ്സുകാരിയും

മീററ്റ്∙ ഉത്തർപ്രദേശിൽ ബഹുനില കെട്ടിടം തകർന്നുവീണ് ഒൻപതുപേർ കൊല്ലപ്പെട്ടു.  മരിച്ചവരിൽ ഒന്നരവയസ്സ് പ്രായമുള്ള പെൺകുഞ്ഞും ഉണ്ട്.  സാജിദ് (40), മകൾ സാനിയ (15), മകൻ സാഖിബ് (11), സിമ്ര (ഒന്നര വയസ്സ്), റീസ (7), നഫോ (63), ഫർഹാന (20), അലിസ (18), ആലിയ (6) എന്നിവരാണു മരിച്ചത്. പരുക്കേറ്റവരിൽ നാലുപേർ ലാലാ ലജ്‍പത് റായ് മെമ്മോറിയൽ മെഡിക്കൽ കോളജ് ആശുപത്രിയിൽ ചികിത്സയിലാണ്.

ഒരാൾ കെട്ടിട അവശിഷ്ടങ്ങൾക്കിടയിൽ കുടുങ്ങിക്കിടക്കുന്നുണ്ടെന്നാണു സൂചന. രക്ഷാപ്രവർത്തനം തുടരുകയാണ്. മീററ്റിൽ ലോഹ്യനഗർ മേഖലയിലാണ് അപകടം സംഭവിച്ചത്. ഇന്നലെ രാത്രിയോടെയാണു മീററ്റിലെ സാക്കിർ കോളനിയിലെ മൂന്നുനില കെട്ടിടം തകർന്നുവീണത്. കഴിഞ്ഞ കുറച്ചുദിവസങ്ങളായി തുടരുന്ന കനത്ത മഴയാണു കെട്ടിടം തകരുന്നതിനു വഴിവച്ചതെന്നാണു സൂചന.

രക്ഷപ്പെടുത്തിയവരിൽ അഞ്ചുപേർ പ്രായപൂർത്തിയാകാത്തവരാണ്. ഇന്നലെ വൈകിട്ട് അ‍ഞ്ച് മണിയോടെയാണ് അപകടം ഉണ്ടായത്. എസ്ഡിആർഎഫ്, എൻഡിആർഎഫ് സംഘങ്ങളെത്തി രക്ഷാപ്രവർത്തനം നടത്തി.