കോടികൾ മുടക്കി മോദിപ്പട, നമോ നായകൻ; ‘പരസ്യമല്ല ഒന്നും’: വർഗീയത ചീറ്റി ‘സറൊഗറ്റ്’ പേജുകൾ; ചെലവിൽ മുന്നിൽ ബിജെപി

നിങ്ങളുടെ എതിരാളി നിങ്ങളുടെ ശത്രുവല്ലെന്ന് ഏകദേശം ഒരാഴ്ച മുൻപാണ് സുപ്രീം കോടതി ബിജെപിയെ ഓർമിപ്പിച്ചത്. ബിജെപി ബംഗാളിൽ നൽകിയ ചില തിരഞ്ഞെടുപ്പ് പരസ്യങ്ങളാണ് ഈ കടുത്ത പരാമർശത്തിനു പിന്നിൽ. തൃണമൂൽ കോൺഗ്രസിനെ ലക്ഷ്യമിട്ടുള്ള ഈ പരസ്യങ്ങൾ കൊൽക്കത്ത ഹൈക്കോടതിയാണ് ആദ്യം വിലക്കുന്നത്. ഇതിനെതിരെ ബിജെപി സുപ്രീം കോടതിയെ സമീപിച്ചു. എന്നാൽ പരസ്യങ്ങൾ പ്രഥമ ദൃഷ്ട്യാ അപകീർത്തികരമെന്ന് കണ്ട കോടതി ഈ ഹർജിയിൽ ഇടപെടാൻ തന്നെ വിസമ്മതിച്ചു. തൃണമൂൽ ഹിന്ദു വിരുദ്ധ പാർട്ടിയാണെന്നടക്കം പറയുന്ന പരസ്യങ്ങളാണ് ബിജെപി പത്രങ്ങളിൽ നൽകിയിരുന്നത്. ബിജെപിക്ക് മാനക്കേടുണ്ടാക്കിയ ഈ കേസിനു ശേഷമാണ് പരസ്യങ്ങളുടെ പിന്നാമ്പുറം തേടിയിറങ്ങാൻ ഞങ്ങൾ തീരുമാനിക്കുന്നത്.