മേയ് മാസത്തിൽ ഇതുവരെ ജയിക്കാത്ത രാജസ്ഥാനും തോൽക്കാത്ത ബെംഗളൂരുവും നേർക്കുനേർ; എലിമിനേറ്റർ കടക്കുമോ സഞ്ജു?

അഹമ്മദാബാദ് ∙ മേയ് മാസത്തിൽ ഇതുവരെ ജയിക്കാത്ത ടീമും തോൽക്കാത്ത ടീമും തമ്മിലുള്ള പോരാട്ടം– ഐപിഎൽ എലിമിനേറ്ററിലെ രാജസ്ഥാൻ റോയൽസ്– റോയൽ ചാലഞ്ചേഴ്സ് ബെംഗളൂരു മത്സരത്തെ ഇങ്ങനെ വിശേഷിപ്പിക്കാം. സീസൺ തുടക്കത്തിൽ ആദ്യ 9 മത്സരങ്ങളിൽ എട്ടും ജയിച്ച് പോയിന്റ് ടേബിളിൽ ഒന്നാം സ്ഥാനക്കാരായിരുന്നു രാജസ്ഥാൻ. എന്നാൽ ഈ മാസം ഇതുവരെ നടന്ന 5 ലീഗ് മത്സരങ്ങളിൽ നാലിലും രാജസ്ഥാൻ തോറ്റു.

ഒരു മത്സരം മഴമൂലം ഉപേക്ഷിക്കുകയും ചെയ്തു. മറുവശത്ത് ആദ്യ 8 മത്സരങ്ങളിൽ ഏഴിലും തോറ്റ ബെംഗളൂരു പിന്നാലെ നടന്ന 6 മത്സരങ്ങളിലും അപരാജിത കുതിപ്പു നടത്തിയാണ് പ്ലേഓഫ് ഉറപ്പിച്ചത്. ലീഗ് ഘട്ടത്തിൽ നേർക്കുനേർ വന്നപ്പോൾ ബെംഗളൂരുവിനെ 6 വിക്കറ്റിന് തോൽപിക്കാൻ സാധിച്ചതിന്റെ ആത്മവിശ്വാസത്തിലാകും രാജസ്ഥാൻ ഇന്നിറങ്ങുക.

എന്നാൽ നിലവിലെ ഫോമിൽ രാജസ്ഥാൻ തങ്ങൾക്ക് വെല്ലുവിളി ഉയർത്തില്ലെന്ന പ്രതീക്ഷയിലാണ് ബെംഗളൂരു. അഹമ്മദാബാദ് നരേന്ദ്രമോദി സ്റ്റേഡിയത്തിൽ രാത്രി 7.30 മുതലാണ് മത്സരം. സ്റ്റാർ സ്പോർട്സ് ചാനലുകളിലും ജിയോ സിനിമ ആപ്പിലും തത്സമയം.