ആലപ്പുഴ ∙ നഗരമധ്യത്തിൽ മുല്ലയ്ക്കൽ ഭാഗത്ത് കുടിവെള്ളം മുടങ്ങിയിട്ട് ഇന്ന് ഒൻപതാം ദിവസം. നാട്ടുകാരും, കൗൺസിലറും കഴിഞ്ഞ 8 ദിവസവും തുടർച്ചയായി ബന്ധപ്പെട്ടിട്ടും സാങ്കേതിക പ്രശ്നം പരിഹരിച്ച് കുടിവെള്ളം വിതരണം ചെയ്യാൻ ജല അതോറിറ്റി തയാറായിട്ടില്ല. അമൃത് ലൈനിൽ വെള്ളം ഉണ്ടെങ്കിലും വീടുകളിൽ കണക്‌ഷൻ നൽകാത്തതിനാൽ വീട്ടുകാർക്ക് ശേഖരിക്കാനും കഴിയുന്നില്ല.
പഴവങ്ങാടി പമ്പ് ഹൗസിൽ തകരാറായ വാൽവ് കഴിഞ്ഞ ആഴ്ച പരിഹരിച്ചു. അതോടെ പള്ളാത്തുരുത്തി, പാലസ്, മുല്ലയ്ക്കൽ, വഴിച്ചേരി, തിരുമല വാർഡുകളിൽ അതുവരെ ഉണ്ടായിരുന്ന ശുദ്ധജലക്ഷാമം ഭാഗികമായി തീർന്നതാണ്. പമ്പിങ് പൂർണ തോതിലാകുന്നതോടെ വാർഡുകളിൽ എല്ലായിടത്തും ജലം എത്തിച്ചേരും എന്നായിരുന്നു അധികൃതരുടെ വിശദീകരണം.
ഇതിനിടെ മുല്ലയ്ക്കൽ പ്രദേശത്തേക്കു മാത്രമായി ജല വിതരണത്തിനു ഉപയോഗിച്ചിരുന്ന കുഴൽക്കിണറിന്റെ പ്രവർത്തനം തകരാറിലായി. അതോടെ പ്രതിസന്ധി കൂടുതൽ രൂക്ഷമായി. മറ്റേതെങ്കിലും വാൽവ് തിരിച്ച് മുല്ലയ്ക്കൽ ഭാഗത്തേക്ക് ജലവിതരണം ക്രമീകരിക്കാനും സാധിക്കുന്നില്ല. കുഴൽക്കിണറിന്റെ തകരാറ് ഏത് തരത്തിൽ ഉള്ളതാണെന്നും പറയുന്നില്ല.
മുല്ലയ്ക്കൽ അമ്പലത്തിനു തെക്ക് ബ്രാഹ്മണസമൂഹ മഠത്തിൽ 12 കുടുംബങ്ങൾക്കും, റെഡ്യാർ പുരയിടത്തിൽ ഏറെ വീടുകൾക്കും പൈപ്പ് കണക്‌ഷനുകളിൽ ശുദ്ധജലം കിട്ടുന്നില്ല. ഞങ്ങൾ താമസിക്കുന്ന ഇടവഴിയിലെ വീടുകളിലും ഇതാണ് സ്ഥിതി. പമ്പ് ഹൗസിൽ ചെന്നപ്പോൾ തകരാറ് പരിഹരിക്കുന്നത് കണ്ടില്ല. മൂന്നു കന്നാസുമായി പോയി ലീറ്ററിനു ഒരു രൂപ പ്രകാരം 60 ലീറ്റർ വെള്ളം ദിവസവും വാങ്ങിയാണ് അത്യാവശ്യ കാര്യങ്ങൾക്ക് ഉപയോഗിക്കുന്നത്. പഠിക്കാൻ പോകുന്ന കുഞ്ഞുങ്ങളാണ് ഏറെ ദുരിതം അനുഭവിക്കുന്നത്.
പൈപ്പ് വെള്ളം അല്ലാതെ ഒരു തുള്ളി വെള്ളം കിട്ടാൻ കുളമോ, കിണറോ, തോടോ ഈ പ്രദേശത്ത് ഇല്ല. ബ്രാഹ്മണസമൂഹ മഠത്തിലും, സമീപ സ്ഥലങ്ങളിലും 9 ദിവസമായി കുടിവെള്ളമില്ല. ഈ പ്രദേശത്തേക്ക് ശുദ്ധജലം വിതരണം ചെയ്യുന്ന വാൽവ് തകരാറായതു പരിഹരിക്കാൻ പല തവണ ജല അതോറിറ്റിയുടെ ഓഫിസിൽ പോയി. നടപടിയില്ല. അസിസ്റ്റന്റ് എൻജിനീയറെ വിളിച്ചു. അവർ ഫോൺ എടുക്കുന്നില്ല. ഉടനടി പരിഹരിക്കേണ്ട കാര്യങ്ങൾ ഇങ്ങനെ നീട്ടിക്കൊണ്ടു പോകുമ്പോൾ ജനങ്ങളാണ് കഷ്ടപ്പെടുന്നത്.
Mullackal, a central city area, has been grappling with a water supply disruption for nine consecutive days. Despite relentless efforts by residents and the local councillor, the Water Authority is yet to identify and rectify the technical glitch responsible for the outage.
ഇവിടെ പോസ്റ്റു ചെയ്യുന്ന അഭിപ്രായങ്ങൾ മലയാള മനോരമയുടേതല്ല. അഭിപ്രായങ്ങളുടെ പൂർണ ഉത്തരവാദിത്തം രചയിതാവിനായിരിക്കും. കേന്ദ്ര സർക്കാരിന്റെ ഐടി നയപ്രകാരം വ്യക്തി, സമുദായം, മതം, രാജ്യം എന്നിവയ്ക്കെതിരായി അധിക്ഷേപങ്ങളും അശ്ലീല പദപ്രയോഗങ്ങളും നടത്തുന്നത് ശിക്ഷാർഹമായ കുറ്റമാണ്. ഇത്തരം അഭിപ്രായ പ്രകടനത്തിന് നിയമനടപടി കൈക്കൊള്ളുന്നതാണ്.
