മനോരമ വേദിയിൽ ഹരിശ്രീ കുറിച്ച് ജർമൻ ബാലികയും

ബെംഗളൂരു ∙ അപ്പൂപ്പനും അമ്മൂമ്മയ്ക്കുമൊപ്പം അവധി ആഘോഷിക്കാനെത്തിയ സിയാറ ശിൽപ് ജർമനിയിലേക്കു മടങ്ങുന്നതു മനോരമ വേദിയിൽ വിദ്യാരംഭം കുറിച്ചതിന്റെ ഓർമകളുമായി. ജർമൻ പൗരൻ ജോനാസ് ശിൽപ്–ബെംഗളൂരു മലയാളി കാവ്യപ്രിയ ദമ്പതികളുടെ മകളായ സിയാറയെ ബെംഗളൂരുവിൽ എഴുത്തുകാരി അനിത നായരാണ് ആദ്യാക്ഷരം എഴുതിച്ചത്.

കൊച്ചുമകൾ അക്ഷരലോകത്തേക്കു പിച്ചവയ്ക്കുന്നതു കാണാൻ ജോനാസിന്റെ അമ്മ കാർമലും എത്തിയിരുന്നു. കാവ്യപ്രിയയുടെ സഹോദരി വിഷ്ണുപ്രിയ യുഎസിലെ ക്ലീവ് ലൻഡിൽ നിന്നാണ് മകൻ നീൽ നാരായണനെ എഴുത്തിനിരുത്താൻ എത്തിയത്. ഭർത്താവ് വടക്കൻ പറവൂർ സ്വദേശി ദിനേശ് ഹരിഹരനും കൂടെയുണ്ടായിരുന്നു. തമിഴ്, കന്നഡ കുട്ടികളും ഇത്തവണ ഹരിശ്രീ കുറിക്കാൻ എത്തിയിരുന്നു.