മാലിന്യം തള്ളാൻ എത്തിയ ലോറി പിടികൂടി

നെടുമ്പാശേരി ∙ മാലിന്യം തള്ളാൻ എത്തിയ മിനി ലോറി നാട്ടുകാർ തടഞ്ഞ് പൊലീസിൽ ഏൽപിച്ചു. ഇന്നലെ പുലർച്ചെ 3 മണിയോടെ ദേശീയപാതയിൽ പറമ്പയം പാലത്തിന് സമീപത്ത് നിന്നാണ് വാഹനം പിടികൂടിയത്. ശുചിമുറി മാലിന്യവുമായെത്തിയ ടാങ്കർ ലോറി തോട്ടിലേക്ക് മാലിന്യം തള്ളാൻ ഒരുങ്ങുമ്പോൾ നാട്ടുകാരിലൊരാൾ കണ്ട് മറ്റുള്ളവരെ വിവരമറിയിക്കുകയായിരുന്നു. തുടർന്ന് നാട്ടുകാരെത്തി വാഹനം തടഞ്ഞിട്ടു. 

വിവരമറിഞ്ഞ് പട്രോളിങ് പൊലീസെത്തി വാഹനത്തിലെ ഡ്രൈവർ തോപ്പുംപടി കരുവേലിപ്പടി കല്ലറയ്ക്കൽ നൈനാസ് (36), തോപ്പുംപടി കുന്നയിൽ സഹീദ് (41) എന്നിവരെ പിടികൂടി. വാഹനം കസ്റ്റഡിയിലെടുത്തു. വാഹനവും പ്രതികളെയും പിന്നീട് നെടുമ്പാശേരി പൊലീസിന് കൈമാറി.