കലാകാരൻമാരുടെ മികവിന് ആഗോള വേദിയൊരുക്കി ആർട്ട് എക്സ്ബിഷൻ കൊച്ചിയിൽ
![artexhibition artexhibition](https://img-mm.manoramaonline.com/content/dam/mm/mo/district-news/ernakulam/images/2024/7/26/artexhibition.jpg?w=1120&h=583)
Mail This Article
കൊച്ചി∙ കേരളത്തിലെയും യുഎഇയിലെയും കലാകാരൻമാരുടെ മികവിന് ആഗോള വേദിയൊരുക്കി ദർബാർ ഹാളിൽ അന്താരാഷ്ട്ര ആർട്ട് എക്സ്ബിഷന് തുടക്കമായി. കേരളത്തിലെയും അറബ് നാടുകളിലെയും കലാകാരൻമാരുടെ ഉന്നമത്തിനായി പ്രവർത്തിക്കുന്ന റിസ്ഖ് ആർട്ട് ഇനീഷേറ്റീവിന്റെ നേതൃത്വത്തിലാണ് എക്സിബിഷൻ. വ്യവസായ വകുപ്പ് മന്ത്രി പി.രാജീവ് എക്സിബിഷൻ ഉദ്ഘാടനം ചെയ്തു. കലാകാരൻമാർക്ക് ആഗോളവേദിയൊരുക്കുന്ന റിസ്ഖ് ആർട്ട് ഇനീഷേറ്റീവിൻറെയും ഷഫീന യൂസഫലിയുടെയും ചുവടുവയ്പ്പ് മാതൃകാപരമെന്നും കേരളത്തിലെ കലാകാരൻമാർക്ക് മികച്ച അവസരമാണ് റിസ്ഖ് ആർട്ട് ഇനീഷേറ്റീവ് നൽകുന്നതെന്നും മന്ത്രി പി. രാജീവ് പറഞ്ഞു.
ഇന്ത്യയും യുഎഇയും തമ്മിലുള്ള ശക്തമായ ബന്ധത്തിന്റെ നേർസാക്ഷ്യമാണ് റിസ്ഖ് ആർട്ട് ഇനീഷേറ്റീവിന്റെ എക്സിബിഷനെന്ന് ചടങ്ങിൽ മുഖ്യാതിഥിയായ എം.എ യൂസഫലി ചൂണ്ടികാട്ടി. ടി.ജെ വിനോദ് എംഎൽഎ ചടങ്ങിൽ അധ്യക്ഷത വഹിച്ചു. ഇന്തോ അറബ് സാംസ്കാരിക കൈമാറ്റത്തിന്റെ വേദികൂടിയാണ് എക്സിബിഷനെന്നും, കേരളത്തിലെയും അറബ് നാടുകളിലെയും കലാകാരൻമാർക്ക് പിന്തുണയുടെ വാതിൽതുറക്കുകയാണ് പ്രദർശനമെന്നും റിസ്ക് ആർട്ട് ഇനീഷേറ്റീവ് ഫൗണ്ടർ കൂടിയായ ഷഫീന യൂസഫലി അഭിപ്രായപ്പെട്ടു.
ലളിതകലാ അക്കാദമി ചെയർമാൻ മുരളി ചീരോത്ത്, അബുദാബി ആർട്ട് ഡയറക്ടർ ദിയാല നസീബ്, റിസ്ഖ് ആർട്ട് ഇനീഷേറ്റീവ് ക്രിയേറ്റീവ് ഡയറക്ടർ മീന വാരി, കേരള ലളിതകലാ അക്കാദമി സെക്രട്ടറി എൻ. ബാലമുരളി കൃഷ്ണൻ, റിസ്ഖ് ആർട്ട് ഇനീഷേറ്റീവ് കോർഡിനേറ്റർ മാളവിക എസ് എന്നിവർ പങ്കെടുത്തു. യുഎഇയിൽ നിന്നുള്ള കലാകാരൻമാരും ചടങ്ങിൽ ഭാഗമായി. എക്സിബിഷൻ ആഗോള കലാമേളയായി മാറുമെന്ന് വീഡിയോ സന്ദേശത്തിൽ സാംസ്കാരിക വകുപ്പ് മന്ത്രി സജിചെറിയാൻ അഭിപ്രായപ്പെട്ടു.
യുഎഇയിലെ കലാകാരൻമാരുടെ സൃഷ്ടികളാണ് പ്രത്യേകമായി പ്രദർശനത്തിലുള്ളത്. ഇന്തോ അറബ് സാംസ്കാരിക വൈവിധ്യത്തിന്റെ സംഗമവേദികൂടിയാണ് പ്രദർശനം. സമകാലിക അറബ് ആർട്ടുകൾ കൊണ്ട് ശ്രദ്ധേയരായ ബിയോണ്ട് എമേർജിങ്ങ് ആർട്ടിസിറ്റ്സുകളുടെ (BEA) സൃഷ്ടികൾ പ്രദർശനത്തിലുണ്ട്. ഹാഷൽ അൽ ലംകി, അൽമഹാ ജറള, സാമോ ഷെലാബി, ലത്തീഫ സയീദ് തുടങ്ങിയ അറബ് കലാകാരൻമാരുടെ സൃഷ്ടികളാണ് പ്രദർശിപ്പിച്ചിരിക്കുന്നത്. വെനീസ്, ഇറ്റലി എന്നിവടങ്ങളിലെ പ്രദർശത്തിന് പിന്നാലെയാണ് ബിയോണ്ട് എമേർജിങ്ങ് ആർട്ടിസിറ്റ്സ് കൊച്ചിയിൽ പ്രദർശനത്തിനെത്തിയിരിക്കുന്നത്. പ്രശസ്ത യുഎഇ കലാകാരനായ ഹാഷൽ അൽ ലംകി, ഡോ വെനീറ്റിയ പോർട്ടർ അടക്കം സാന്നിധ്യം വഹിച്ചിട്ടുള്ള ഗെറ്റ് വേ അന്തരാഷ്ട്ര എക്സബിബിഷനിലെ കലാകാരൻമാരും എക്സിബിഷനിൽ ഭാഗമാകും.
കേരളത്തിൽ നിന്നുള്ള 14 കലാകാരൻമാർ അടക്കം ഇന്ത്യയിലെ 27 കലാകാരൻമാരുടെ സൃഷ്ടികൾ നേരത്തെ യുഎഇയിൽ റിസ്ഖ് ആർട്ട് ഇനിഷേറ്റീവ് പ്രദർശിപ്പിച്ചിരുന്നു. ഇതിന്റെ തുടർച്ചയായാണ് യുഎഇയിലെ കലാകാരൻമാരുടെ സൃഷ്ടികൾക്ക് കൊച്ചിയിൽ വേദിയൊരുക്കിയത്.
ലോകോത്തര കലാകാരൻമാർ ഭാഗമാകുന്ന പാനൽചർച്ചയും ഒരുക്കിയിട്ടുണ്ട്. കേരളത്തിലെ കലാകാരൻമാരെ പ്രോത്സാഹിപ്പിക്കുന്നതായി ഫെലോഷിപ്പുകളും ഷഫീന യൂസഫലിയുടെ നേതൃത്വത്തിൽ നൽകിവരുന്നു. പശ്ചിമേഷ്യയിലെ കലാകാരൻമാരെ അബുദാബിയിലെ റിസ്ക്ക് ആർട്ട് ഇനിഷ്യേറ്റീവ് ആസ്ഥാനത്ത് എത്തിച്ച് സൗജന്യമായി ലോകോത്തര നിലവാരത്തിലുള്ള പരിശീലനവും നൽകുന്നുണ്ട്.