ട്രോളിങ് നിരോധനം കഴിഞ്ഞു, പക്ഷേ കടൽ കനിഞ്ഞില്ല: ബോട്ടുകൾക്ക് ലഭിച്ചത് കിളിമീനും ചൂരയും

കൊച്ചി∙ ട്രോളിങ് നിരോധനത്തിനു ശേഷം വൈപ്പിനിൽ നിന്നു കടലിൽ പോയ ബോട്ടുകൾക്കു കിട്ടിയതു കിളിമീൻ. തോപ്പുംപടി ഹാർബറിൽ നിന്നു പോയ ബോട്ടുകളിൽ ചെറിയ ഇനം ചൂര എത്തി. എന്നാൽ പഴ്സീൻ ബോട്ടുകളിൽ പലതും കാര്യമായ മീൻ കിട്ടാതെ മടങ്ങി. മൺസൂൺകാല ട്രോളിങ് നിരോധനം അവസാനിച്ചതോടെയാണു ബോട്ടുകൾ കടലിൽ പോയത്. കൊല്ലത്തു നിന്ന് മത്സ്യബന്ധനത്തിനു പോയ ബോട്ടുകൾക്കു കിളിമീനും കരിക്കാടി ചെമ്മീനും ലഭിച്ചത് കൊച്ചിയിലെ ബോട്ട് ഉടമകൾക്കു പ്രതീക്ഷ നൽകുന്ന കാര്യമാണ്.     

വൈപ്പിനിൽ ഇന്നലെ തിരിച്ചെത്തിയ ഏതാനും ബോട്ടുകൾക്കു സാമാന്യം വലിയ കിളിമീൻ കിട്ടി. വേണ്ടത്ര മീൻ സംഭരിച്ച ബോട്ടുകൾ ഇന്നു മുതൽ എത്തിത്തുടങ്ങും. പൂവാലൻ ചെമ്മീൻ കിട്ടാൻ സാധ്യതയുണ്ട്. കണവ, കിനാവള്ളി എന്നിവ ലക്ഷ്യമിട്ട് ദൂരേക്കു നീങ്ങിയ ബോട്ടുകൾ തിരിച്ചെത്താൻ ദിവസങ്ങൾ എടുക്കും. കാലാവസ്ഥാ മുന്നറിയിപ്പ് ഉണ്ടായിരുന്നതിനാൽ ചെറിയ ബോട്ടുകളിൽ ഒരു വിഭാഗം കടലിൽ പോയില്ല. മഴ കനക്കുകയും കടൽ ഇളകി മറിയുകയും ചെയ്യുന്നതു പ്രതിസന്ധിയാണെങ്കിലും ചെമ്മീൻ ലഭ്യതയ്ക്കു സാധ്യത കൂടുമെന്നു തൊഴിലാളികൾ പറയുന്നു. 

തോപ്പുംപടി ഹാർബറിൽ നിന്നു പോയി മടങ്ങിയ ബോട്ടുകളിൽ പലതിനും 25,000 മുതൽ ഒന്നര ലക്ഷം രൂപ വരെ വിലയുള്ള മീനാണു ലഭിച്ചത്. ഡീസലിനുള്ള മീൻ പോലും കിട്ടിയില്ലെന്ന് ചില ബോട്ട് ഉടമകൾ പറഞ്ഞു. തകരാർ മൂലം പണി എടുക്കാനാകാതെ മടങ്ങിയ ബോട്ടുകളുമുണ്ട്. ട്രോളിങ് ബോട്ടുകളും ചൂണ്ട ബോട്ടുകളും ഇന്നും തുടർന്നുള്ള ദിവസങ്ങളിലുമായി മടങ്ങിയെത്തും. ആഴക്കടൽ മത്സ്യബന്ധനത്തിനു പോകുന്ന ഗിൽനെറ്റ് ബോട്ടുകൾ അടുത്ത ആഴ്ച കടലിൽ‍ ഇറങ്ങും.