ശക്തമായ മഴയും ഇടിമിന്നലും; അണക്കരയിൽ കനത്ത നാശം

അണക്കര ∙ ശക്തമായ മഴയോടൊപ്പം ഉണ്ടായ ഇടിമിന്നലിൽ അണക്കര മേഖലയിൽ കനത്ത നാശനഷ്ടം. അണക്കര ഉദയഗിരിമേട് ഭാഗത്ത്  വീടുകൾക്ക് ഇടിമിന്നലിൽ കേടുപാട് സംഭവിച്ചു. വൈദ്യുത ഉപകരണങ്ങളും വയറിങ്ങും ഉൾപ്പെടെ കത്തി നശിച്ചു. കഴിഞ്ഞ 2 ദിവസവും ഈ മേഖലയിൽ ശക്തമായ മഴ പെയ്തു. ചൊവ്വാഴ്ചയുണ്ടായ കനത്ത ഇടിമിന്നലിൽ രണ്ട് വീടുകൾക്ക് കേടുപാട് സംഭവിച്ചു.  ഉദയഗിരിമേട്ടിൽ കൊട്ടാരം പറമ്പിൽ കുര്യാക്കോസിന്റെ ഉടമസ്ഥതയിലുള്ള രണ്ട് വീടുകൾക്കാണ് നാശനഷ്ടം ഉണ്ടായത്. വാടകയ്ക്ക് നൽകിയിരിക്കുന്ന ഈ വീടുകളിൽ ഈ സമയം ആളുകൾ ഇല്ലാതിരുന്നതിനാൽ വലിയ ദുരന്തം ഒഴിവായി. 

കുമരിയാരു പറമ്പിൽ സജീവ് താമസിക്കുന്ന വീട്ടിലാണ് കൂടുതൽ നാശനഷ്ടം . മിന്നലേറ്റ് ജനൽ പാളികളും വീട്ടിലെ വൈദ്യുത സ്വിച്ച് ബോർഡുകളും ഉൾപ്പെടെ പൊട്ടിത്തെറിച്ചു. ടിവി, അക്വേറിയം, വൈദ്യുതോപകരണങ്ങൾ എന്നിവയും ഇടിമിന്നലിൽ നശിച്ചു. തൊട്ടടുത്ത വീട്ടിലെയും സ്വിച്ച് ബോർഡുകൾക്കും വൈദ്യുതോപകരണങ്ങൾക്കും കേടുപാടുകൾ സംഭവിച്ചു. ഈ മേഖലയിലെ നിരവധി വീടുകളിലെ ടിവി ഉൾപ്പെടെയുള്ള ഗൃഹോപകരണങ്ങൾക്ക് ഇടിമിന്നലിൽ കേടുപാടുകൾ സംഭവിച്ചു.