വൈഫൈ, ചാർജിങ് പോർട്ട്, വിഡിയോ ഡിസ്പ്ലേ, മ്യൂസിക് സിസ്റ്റം...; തിരുവനന്തപുരം – തൊടുപുഴ പ്രീമിയം എസി സൂപ്പർ ഫാസ്റ്റ് ആരംഭിച്ചു

തൊടുപുഴ∙ തിരുവനന്തപുരം കെഎസ്ആർടിസി ഡിപ്പോയിൽ കഴിഞ്ഞദിവസം നിരത്തിലിറക്കിയ പ്രീമിയം സൂപ്പർ ഫാസ്റ്റ് എസി ബസുകളിൽ ഒരെണ്ണം തൊടുപുഴയിലേക്ക് സർവീസ് ആരംഭിച്ചു. രാവിലെ 6.45ന് തിരുവനന്തപുരത്തുനിന്നു പുറപ്പെടുന്ന ബസ് 12.15നു തൊടുപുഴയിൽ എത്തും. ഉച്ചകഴിഞ്ഞ് 2.10ന് തൊടുപുഴയിൽ നിന്ന് തിരികെ പോകുന്ന ബസ് രാത്രി 7.40ന് തിരുവനന്തപുരത്ത് എത്തും. 330 രൂപയാണ് തൊടുപുഴയിൽനിന്നു തിരുവനന്തപുരത്തിനുള്ള നിരക്ക്. വൈഫൈ, മൊബൈൽ ചാർജിങ് പോർട്ട്, വിഡിയോ ഡിസ്പ്ലേ, വായനയ്ക്കുള്ള ലൈറ്റ്, മ്യൂസിക് സിസ്റ്റം തുടങ്ങിയ സൗകര്യങ്ങൾ ബസിൽ ഉണ്ട്. വെഞ്ഞാറമൂട്, കിളിമാനൂർ, ചടയമംഗലം, വാളകം, കുന്നിക്കോട്, പത്തനാപുരം, കൂടൽ, കോന്നി, പത്തനംതിട്ട, റാന്നി, എരുമേലി, കാഞ്ഞിരപ്പള്ളി, ഈരാറ്റുപേട്ട, പാലാ വഴിയാണ് സർവീസ്.