പഞ്ചായത്ത് അംഗത്തിന്റെ ഇടപെടൽ: എരഞ്ഞോളി പുഴയോര പാർക്കിലെ വിളക്കുകൾ തെളിഞ്ഞു
Mail This Article
തലശ്ശേരി∙ എരഞ്ഞോളി പൂഴയോര പാർക്കിൽ ഒരു മാസമായി തെളിയാത്ത വിളക്കുകൾ പഞ്ചായത്ത് അംഗത്തിന്റെ ഇടപെടലിൽ മണിക്കൂറുകൾക്കകം പ്രകാശിച്ചു. എരഞ്ഞോളി പാലം മുതൽ ശ്രീനാരായണ മഠം വരെ ഫിഷറീസ് റോഡിൽ പുഴയോര സൗന്ദര്യവൽക്കരണത്തിന്റെ ഭാഗമായി സ്ഥാപിച്ച പാർക്കിലാണ് കഴിഞ്ഞ ഒരു മാസമായി വിളക്കുകൾ തെളിയാതിരുന്നത്. 21 അലങ്കാര വിളക്കുകളാണ് പുഴയോരത്ത് സ്ഥാപിച്ചത്. കഫെറ്റീരിയയും പ്രവർത്തിക്കുന്നുണ്ട്. ദിവസവും നൂറുകണക്കിനാളുകൾ കുടുംബ സമേതം പുഴയോരത്ത് എത്താറുണ്ട്. വിളക്കുകൾ തെളിയാതായതോടെ ആളുകൾ കുറഞ്ഞു.
ഇന്നലെ പഞ്ചായത്ത് അംഗം സുശീൽ ചന്ത്രോത്ത് പാർക്കിന്റെ ചുമതലക്കാരായ ഡിടിപിസി അധികൃതരെ വിളിച്ചു കാര്യങ്ങൾ അന്വേഷിച്ചു. പിക്കോസിനാണ് കരാർ ചുമതലയെന്നും അവരാണ് അറ്റകുറ്റപ്പണി നടത്തേണ്ടെന്നുമായിരുന്നു മറുപടി. ഉടനെ പിക്കോസ് ചെയർമാനെ വിളിച്ചു കാര്യം പറഞ്ഞതോടെ അദ്ദേഹം ഉടനെ ഇടപെടാമെന്നും ഡിടിപിസിയുമായി സംസാരിച്ച് നടപടി എടുക്കാമെന്നും അറിയിച്ചു. ഏതാനും മണിക്കൂറുകൾ കഴിയുമ്പോഴേക്കും പിക്കോസ് അധികൃതരും ഡിടിപിസി അധികൃതരും പാർക്കിൽ എത്തി തൊഴിലാളികളെ വച്ചു അറ്റകുറ്റപ്പണി നടത്തി സന്ധ്യയാവുമ്പോഴേക്കും പുഴയോര പാർക്കിലെ വിളക്കുകളെല്ലാം തെളിഞ്ഞു.