ഒരു വാഴയുടെ പിണ്ടിയിൽ നിന്ന് 2 വാഴക്കുല; വാഴത്തോട്ടത്തിലെ അപൂർവ കാഴ്ച

ചെറുപുഴ∙ ഒരു വാഴയുടെ പിണ്ടിയിൽ നിന്നു 2 വാഴക്കുല. വാണിയംകുന്നിലെ പള്ളിപ്പറമ്പിൽ ജോജി ജോസഫിന്റെ വാഴത്തോട്ടത്തിലാണ് ഈ കാഴ്ച. 10 മാസം മുൻപാണു ജോജി ചെറുപുഴയിലെ ഒരു നഴ്സറിയിൽ നിന്നു വിവിധയിനം വാഴവിത്തുകൾ വാങ്ങി നട്ടത്. ഇതിൽ ഞാലിപ്പൂവൻ ഇനത്തിൽപെട്ട വാഴയുടെ പിണ്ടിയിൽ നിന്നാണു 2 കുലകൾ വന്നത്. ആദ്യത്തെ കുല മുകളിലോട്ടാണ്. ഈ കുലയ്ക്ക് കൂമ്പില്ല. കുറച്ചു മുകളിൽ നിന്നുമാണു രണ്ടാമത്തെ കുല ഉണ്ടായത്. ഈ കുല സാധാരണ പോലെ താഴോട്ടാണു കിടക്കുന്നത്. കൂടാതെ കുലയ്ക്ക് കൂമ്പുമുണ്ട്. ആദ്യത്തെ കുലയിൽ കായകളുടെ എണ്ണം കുറവാണെങ്കിലും വലുപ്പമുണ്ട്. രണ്ടാമത്തെ കുലയിൽ എണ്ണം കൂടുതലാണെങ്കിലും വലുപ്പം കുറവാണ്. വാഴയുടെ മുകൾഭാഗത്ത് ഇതുവരെയും കുലയുണ്ടായിട്ടില്ല. രണ്ടു വാഴ വിത്തുകൾ ഉണ്ടാകുകയും ചെയ്തു.