യുവാവിനെ വിവസ്ത്രനാക്കി വൈദ്യുതത്തൂണിൽ കെട്ടിയിട്ടു മർദിച്ച 4 പേർ അറസ്റ്റിൽ

തെന്മല ∙ കൊല്ലം ഇടമണ്ണിലെ ആനൂരിൽ യുവാവിനെ വിവസ്ത്രനാക്കി വൈദ്യുതത്തൂണിൽ കെട്ടിയിട്ടു മർദിച്ചു പരുക്കേൽപിച്ച 4 പേർ അറസ്റ്റിൽ. പെൺസുഹൃത്തിന്റെ വീട്ടിൽ അർധരാത്രി തടഞ്ഞുവച്ചു മർദിച്ച ശേഷം ദൃശ്യങ്ങൾ മൊബൈലിൽ പകർത്തി സമൂഹമാധ്യമത്തിൽ പങ്കുവയ്ക്കുകയായിരുന്നു. ഇടമൺ സുബി ഭവനിൽ സുജിത്ത് (34), ഇടമൺ ആനപ്പെട്ടകോങ്കൽ തെക്കേവിള വീട്ടിൽ രാജീവ് (30), ഇടമൺ കല്ലുപറമ്പിൽ വീട്ടിൽ സിബിൻ (28), ഇടമൺ രാഹുൽ ഭവനിൽ അരുൺ (34) എന്നിവരെയാണ് കൊലപാതകശ്രമക്കേസിൽ തെന്മല പൊലീസ് അറസ്റ്റ് ചെയ്തത്.

ഒരാൾ ഒളിവിലാണ്.ഇടമൺ പൂവണ്ണംമുക്ക് ആദിൽ മൻസിലിൽ നിഷാദിനാണ് (42) അഞ്ചംഗ സംഘത്തിന്റെ മർദനത്തിൽ ഗുരുതരമായി പരുക്കേറ്റത്. സുജിത്തും നിഷാദും തമ്മിലുള്ള മുൻവൈരാഗ്യമാണു സംഭവത്തിൽ കലാശിച്ചതെന്നും ഇവർക്കെതിരെ കേസുണ്ടെന്നും പൊലീസ് പറഞ്ഞു. കഴിഞ്ഞ വ്യാഴം രാത്രി 11നായിരുന്നു സംഭവം. 

സംഭവത്തെക്കുറിച്ച് പൊലീസ് പറയുന്നത്: ആനൂരിലെ പെൺസുഹൃത്തിന്റെ വീട്ടിലെത്തിയ സുജിത്തിനെയും രാജീവിനെയും കണ്ട നിഷാദ് വീടിന്റെ പിൻവാതിലിലൂടെ രക്ഷപ്പെടാൻ ശ്രമിച്ചു. അഞ്ചംഗ സംഘം നിഷാദിനെ പിടികൂടി വീടിന്റെ മുൻഭാഗത്തു കൊണ്ടുപോയി കമ്പികൊണ്ടു കാലുതല്ലി ഒടിക്കുകയായിരുന്നു. വാൾ ഉപയോഗിച്ചു തലയിൽ വെട്ടാൻ ശ്രമിച്ചെങ്കിലും നിഷാദ് ഒഴിഞ്ഞുമാറി. നട്ടെല്ലിലും കാലിലും മുതുകിലും അടിച്ചു വീണ്ടും പരുക്കേൽപിച്ചു. തുടർന്ന് നിഷാദിനെ വിവസ്ത്രനാക്കി വൈദ്യുതത്തൂണിൽ കെട്ടിയിട്ടു മർദിച്ച ശേഷം ഇതിന്റെ ദൃശ്യങ്ങൾ മൊബൈൽ ഫോണിൽ പകർത്തി സമൂഹമാധ്യമങ്ങളിൽ പ്രചരിപ്പിക്കുകയായിരുന്നു. ഗുരുതരമായി പരുക്കേറ്റ നിഷാദ് പുനലൂർ ഗവ. താലൂക്ക് ആശുപത്രിയിൽ ചികിത്സയിലാണ്. എസ്ഐ എസ്.രാജശേഖരന്റെ നേതൃത്വത്തിലുള്ള സംഘമാണു പ്രതികളെ അറസ്റ്റ് ചെയ്തത്. ഇവരെ ഇന്ന് കോടതിയിൽ ഹാജരാക്കും.