നായനാർ പറഞ്ഞു: ‘ഒൺലി പൊളിറ്റിക്സ് ആൻഡ് ഫ്രണ്ട്സ്’

∙ ഇടുക്കി എംപിയായിരുന്ന കാലത്തെ അനുഭവം ഫ്രാൻസിസ് ജോർജ് ഓർമിച്ചു. ഇ.കെ. നായനാർ മന്ത്രിസഭയിൽ പി.ജെ.ജോസഫ് അംഗമായിരുന്ന കാലമാണ്. വിദേശ യാത്രയ്ക്കു പോകുന്ന നായനാരെയും ജോസഫിനെയും യാത്രയാക്കാൻ ഫ്രാൻസിസ് ജോർജ് ഡൽഹി വിമാനത്താവളത്തിൽ എത്തി. 

മണ്ഡലം മുഴുവൻ ഓടിനടക്കുന്ന സ്വഭാവക്കാരനാണ് ഫ്രാൻസിസ് ജോർജ്. ഇക്കാര്യത്തെപ്പറ്റി നായനാരുടെ കമന്റ്: ‘‘താൻ ഭയങ്കര ഓട്ടമാണല്ലോടോ! ഇങ്ങനെ ഓടിയിട്ട് ഒന്നും ഫലമില്ല. തിരഞ്ഞെടുപ്പിൽ ജയിക്കാൻ ഇതൊന്നും പോരാ. അതിനു വേണ്ടത് ഒൺലി പൊളിറ്റിക്സ് ആൻഡ് ഫ്രണ്ട്സ്.’’ 

രാഷ്ട്രീയവും മുന്നണിയുമാണ് പ്രധാനം. അതു മാത്രമാണു തിരഞ്ഞെടുപ്പിലെ വിജയം നിർണയിക്കുന്നത് എന്നായിരുന്നു നായനാരുടെ നിരീക്ഷണം. ജനപ്രതിനിധിയെന്ന നിലയിൽ എല്ലാ സ്ഥലങ്ങളിലും ഓടിയെത്താനുള്ള ശ്രമത്തെക്കുറിച്ച് സംസാരിക്കുമ്പോഴാണു കെ.ഫ്രാൻസിസ് ജോർജ് ഈ ഓർമ പങ്കുവച്ചത്.